Íslenskt ævintýra app fyrir börnin

„Ég sagði upp vinnunni minni þrátt fyrir að vera með góð laun og ákvað að gefa mig allan í þetta verkefni. Maður lifir bara einu sinni og annaðhvort eltir maður drauma sína eða gerir bara ekki neitt,“ segir Bjarni Einarsson.

Hann hefur nú hannað nýtt smáforrit sem heitir Ævintýrakistan og er sérstaklega ætlað börnum og fjölskyldum þeirra. Appið samanstendur af myndskreyttum hljóðbókum með Grímsævintýrunum sem bæði henta fyrir android-síma og iPhone.

Bjarni segist hafa ákveðið að endurskrifa Grimmsævintýrin eftir að hafa rætt við vini sína sem eiga börn. Í ljós kom að lítið er um íslenskt efni fyrir börn í rafrænu formi, en börn hafa sífellt meiri áhuga á spjaldtölvum.

„Það hefur alltaf verið draumur hjá mér að búa til mitt eigið forrit en ekki eingöngu selja annarra manna hugmyndir. Ég fékk því tólf teiknara með mér í sjálfboðavinnu og góð vinkona mín tók að sér að lesa sögurnar inn.“

Sjálfur segist Bjarni hafa flutt til Selfoss og búið í bílskúr til að fjármagna verkefnið. Á daginn kenndi hann crossfit til að geta unnið að þessu launalaust á kvöldin. „Mörg skipti vaknaði ég upp í bílskúrnum á Selfossi og hugsaði: „Hvað varstu að gera drengur, hvernig datt þér þetta í hug?““

Draumurinn varð að veruleika í febrúar þegar sex bækur komu út á íslensku og þrjár á ensku, en stefnan er að búa til meira af fallegu barnaefni í framtíðinni. „Það hefur sýnt sig í gegnum tíðina að þessi rafræni miðill er framtíðin fyrir okkur öll. Þú getur nánast stjórnað heilu heimsveldi úr þessum spjaldtölvum í dag.“



Hægt er að nálgast hljóðbækurnar hér