Hjólaskautadiskó haldið í Ráðhúsinu

„Við erum á fullu að vinna í því að breyta bílastæðakjallaranum um þessar mundir,“ segir Hildur Gunnlaugsdóttir, arkítekt og umhverfisfræðingur hjá umhverfis- og skipulagsráði Reykjavíkurborgar.

Hún er einn af skipuleggjendum hjólaskautadiskós í bílakjallara Ráðhússins. Viðburðurinn fer fram þann 20. september næstkomandi á milli klukkan 17 og 20.

„Þetta verður ofboðslega skemmtilegt. Þarna verður plötusnúður, Roller Derby-félag Íslands, sem koma einnig að skipulagningunni, og nemendur úr Listaháskólanum ætla að setja upp diskókúlur og fleira,“ segir Hildur.

Í fyrra var fjórum bílastæðahúsum borgarinnar breytt í stofu, bíósal, útsýnispall og hjólaskautadiskó og gaf hið síðastnefnda góða raun.

„Hjólaskautadiskóið í fyrra var samt ekki jafn veglegt og það sem við sjáum fyrir okkur í ár,“ segir Hildur, létt í bragði. En það eru nemendur sem útskrifuðust úr arkítektúr úr Listaháskóla Íslands sem sjá um umgjörð og hönnun diskósins.

Uppátækið er kostað af Bílastæðasjóði.

„Þeir eru hressir hjá Bílastæðasjóði. Það er auðvitað þeirra hagsmunamál að fólki átti sig á því hvar bílastæðahúsin eru, enda oft illa nýtt. Við hjá Reykjavíkurborg sem önnumst skipulagninguna viljum líka að fólk gerir sér betur grein fyrir því hvað einkabíllinn tekur mikið pláss. Það er hægt að breyta bílastæðakjallara í heilt diskó!“ segir Hildur að lokum og bætir við:

„Við ætlum líka að biðja fólk sem á hjólaskauta og vill gefa þá eða losa sig við þá að koma með þá í þjónustuverið hjá okkur í Borgartúni 12-14 eða í móttökuna í Ráðhúsinu.“