Arnar Eggert fer í doktorsnám

Tónlistarsérfræðingurinn Arnar Eggert Thoroddsen hefur ákveðið að framlengja námsdvöl sína við Edinborgarháskóla. Hann hefur lokið meistarnámi sínu í tónlistarfræði, eða musicology, og hyggur nú á þriggja ára doktorsnám.

„Þetta leggst afar vel í mig. Stefnan var alltaf að taka doktor hérna úti og ég er mjög glaður með að það hafi gengið eftir. Ég er þá að fara að vinna með Simon Frith, sem er mikill poppfræðigúrú. Hann lagði í raun línurnar fyrir fagið sem slíkt fyrir áratugum og er virtur prófessor í alþjóðaháskólasamfélaginu,“ segir Arnar Eggert, spurður út í námið.

„Mastersnámið var bara eitt ár og í raun réttu nokkurs konar undirbúningur fyrir doktorinn. Íslensk tónlist mun þá tengjast inn í þetta doktorsverkefni og ég get þá unnið úr þeirri reynslu og þekkingu sem ég hef þegar öðlast.“

Verðurðu þá alfróður um tónlist að náminu loknu? „Já, mér er sagt að ég verði alfróður um tónlistina þegar doktornum lýkur. Þá get ég loksins hætt að hlusta á þessa tónlist,“ segir hann og hlær.