Læknisfræði á mannamáli

„Lífsstíll, heilsuefling og forvarnir eru helstu áhersluatriði þáttanna og við tengjum þær áherslur við fræðslu um hina ýmsu sjúkdóma og kvilla, samanber hjarta- og æðasjúkdóma, krabbamein, innkirtla- og efnaskiptasjúkdóma, barnasjúkdóma auk andlegra þátta sem skipta sköpum í þróun hinna ýmsu vandamála. Ýmis viðkvæm mál verða einnig tekin fyrir, svo sem steranotkun karla, þvagleki kvenna, kynlíf og margt fleira áhugavert,“ segir Teitur Guðmundsson, sem ásamt Telmu Tómasson stýrir væntanlegum þáttum sem nefnast einfaldlega Doktor.

„Áhorfendur mega búast við því að þarna fari þáttur sem verður upplýsandi og skemmtilegur, tekur á málefnum tengdum heilsu á líflegan hátt og kannski eins og einhver sagði „læknisfræði á mannamáli“. Undirtónninn í þáttunum er að almenningur taki með sér boðskap úr þeim sem vonandi mun geta haft jákvæð áhrif á líf þeirra og líðan.“

Teitur segir eitt og annað hafa komið á óvart við vinnslu þáttanna.

„Hversu mikinn tíma það tekur að gera slíka þætti og hvað það eru mörg handtök sem þarf til að setja slíkt saman. Einnig var gaman að finna hvað það var mikill áhugi hjá fagfólki á að taka þátt og leggja sitt af mörkum.“