Lífshættan er vinsælust

„Nærmyndir af fólki hafa alltaf verið vinsælastar í Íslandi í dag; sögur af fólki í óvenjulegum aðstæðum, ásamt baráttu- og sigursögum. Einnig innslög þar sem mikill hraði og spenna koma við sögu, helst þar sem við höfum verið í „lífshættu“ eins og fallhlífarstökki, með Landhelgisgæslunni, löggunni, sjúkraflutningamönnum eða einhvers staðar úti á ballarhafi eða uppi í háloftum,“ segir Sindri Sindrason, ritstjóri og einn þáttagerðarmanna Íslands í dag.

Sindri segir veturinn fram undan vera spennandi. „Við ætlum að henda okkur í hvert snilldarefnið á fætur öðru en helsta breytingin verður eflaust sú að mánudagar verða fréttatengdari en hingað til.“

Auk Sindra starfa við þáttinn þau Ásgeir Erlendsson og Hugrún Halldórsdóttir en nýliðinn í hópnum er Birta Björnsdóttir.

„Hópurinn samanstendur af ólíkum einstaklingum sem hafa menntað sig á ólíkum sviðum í háskóla og við bjóðum Birtu hjartanlega velkomna í þáttinn.“

Sindri kveðst ekki geta gert upp á milli viðmælenda sinna.

„Flestir viðmælenda minna eru eftirminnilegir á einhvern hátt. Mörg af þeim málefnum sem við tökum fyrir eru viðkvæm og erfið fyrir fólk að tala um. Við gerum okkur fyllilega grein fyrir þessu og að flestir viðmælenda okkar eru óvanir sjónvarpi. Ég hef nú verið í Íslandi í dag í yfir fimm ár og á Stöð 2 hátt í tíu ár og held að fólk sé farið að þekkja hvernig maður gerir hlutina. Það vinnur með okkur.“

En hvernig kemur lýðveldið Ísland Sindra fyrir sjónir í dag? „Vonandi erum við á réttri leið eftir hrunið en ég held að við þurfum að passa okkur á að vera ekki of rétthugsandi og muna að það þarf að vera pláss fyrir fleiri skoðanir en eina. Þó svo að allir séu ekki sammála manni þýðir það ekki að viðkomandi viti ekki betur eða skilji ekki hlutina.“