Uppnám vegna tónskáldsins Tsjaíkovskíjs

Söguleg mynd byggð á ævi tónskáldsins Pyotrs Ilyich Tsjaíkovskíj er í undirbúningi í Rússlandi.

Myndin sýnir Tsjaíkovskíj sem gagnkynhneigðan mann í ástarsorg.

Samkvæmt blaðamanni rússneska blaðsins Novaya Gazeta, gerði upprunalega handritið ráð fyrir samkynhneigð Tsjaíkovskíjs, sem meðal annars skrifaði heila sinfóníu um frænda sinn og ást sína á honum.

Handritshöfundur myndarinnar segir nú ekkert til í því að tónskáldið mikla hafi verið samkynhneigt.

Samkynhneigðir í Rússlandi hafa orðið fyrir miklu mótlæti og ofbeldi síðan lög gegn samkynhneigð í Rússlandi voru samþykkt í maí. Lögin gera það að verkum að ólöglegt er að vera með „samkynhneigðan áróður“.

Pútín, forseti Rússlands, varði lögin þegar þau urðu tilefni gagnrýni og mótmæla um allan heim. Hann sagðist ekkert hafa á móti samkynhneigðum og lét meðal annars hafa eftir sér í viðtali að Tsjaíkovskíj hefði sennilega verið samkynhneigður.

„Við elskum hann bara vegna tónlistarinnar og hann var frábært tónskáld. Það er það eina sem skiptir máli,“ sagði forsetinn.

Hinn 23. september næstkomandi frumsýnir The Metropolitan Opera í New York óperuna Evgeny Onegin, eftir Tsjaíkovskíj.

Óperuhúsið er þannig að setja upp sýningu eftir samkynhneigt, rússneskt skáld, með tvo Pútín-stuðningsmenn í aðalhlutverki; Önnu Netrebko, í hlutverki Tatiönu og Valery Gergiev, sem stjórnar óperunni.

Óperuhús af þessari stærðargráðu skipuleggja dagskrá sína mörg ár fram í tímann, en nú eru stjórnendur hússins í miklum vandræðum með hvort þeir eigi yfirhöfuð að sýna óperuna.

Þegar hefur fjöldamörgum undirskriftum verið safnað gegn því að sýningin verði sett á svið og háværar óánægjuraddir hafa heyrst um uppsetningu verksins í óperunni.