Mikil hátíðarhöld í Vatnsmýrinni

„Það verður tryllt partí á grasflötinni fyrir neðan Háskóla Íslands alla helgina. Þetta er í raun eins og sveitaball nema það er bara stutt í miðbæinn,“ segir María Rut Kristinsdóttir, formaður Stúdentaráðs Háskóla Íslands, um hina árlegu bjórhátíð sem haldin verður í Vatnsmýrinni um helgina. Hátíðin nefnist Októberfest og er að þýskri fyrirmynd.

„Hátíðin hefst á morgun með tónleikum í risastóru tjaldi sem við höfum sett upp,“ útskýrir María Rut, en Blaz Roca, Friðrik Dór, Jón Jónsson, Úlfur Úlfur, Mammút, Fm Belfast og 1860 eru á meðal þeirra hljómsveita sem koma fram.



Á föstudagskvöld verður þýsk stemning ráðandi og að sögn Maríu Rutar mætir fólk gjarnan í búningum það kvöld enda er þá haldin búningakeppni og er til mikils að vinna. „Strákarnir eru margir með yfirvaraskegg sem þeir hafa safnað sérstaklega fyrir hátíðina.“



Bjórhátíðin hefur verið haldin hátíðleg frá árinu 2002 og hvert ár er nýtt met í bjórdrykkju sett. „Það seldust um tuttugu til þrjátíu þúsund bjórar á síðasta ári og stefnum við á að toppa það met um helgina, Hægt er að kaupa miða á Midi.is,“ segir María Rut að lokum.