Nasty Gal malar gull

Frumkvöðullinn og eigandi netverslunarinnar Nasty Gal, Sophia Amoruso, er stödd í New York þessa dagana þar sem hún kynnir nýjustu „Ready to Wear“-línu Nasty Gal.

Árið 2012 var mjög gott hjá tískuveldinu, en það halaði inn hvorki meira né minna en 20 milljörðum íslenskra króna fyrir sölu á fatnaði og fylgihlutum.

Tískuveldið Nasty Gal hefur heldur betur slegið í gegn en verslunin leggur áherslu á klæðnað og fylgihluti fyrir konur á aldrinum 15-35 ára.

Amoruso sagði nýlegu frá því í viðtali við Style.com að velgengni fyrirtækisins væri meðal annars vegna þess hversu mikla áherslu hún leggur á ljósmyndirnar.

Mikil vinna fer í að mynda fötin á síðunni og hver flík er mynduð í bak og fyrir. Hún segir að myndirnar séu unnar af mikilli ást og nákvæmni, sem er lykilatriði ef þú ætlar að vera með    fataverslun á netinu.

Amoruso hélt því einnig fram að það skipti miklu máli að vera með föt sem standa upp úr og eru öðruvísi þar sem þeim er frekar veitt eftirtekt.