"Dröslaði mér næstum upp á topp"

Nafn? Ásta Sveinsdóttir

ALDUR? 32 

STARF? Eigandi suZushi og einn eigenda Roadhouse

Hvern faðmaðir þú síðast?

Dóttur mína Hönnu sem er fjögurra ára. 

En kysstir? Sveinbjörgu vinkonu mína fyrir að vera svona frábær og fyrir að nenna að hanga með alveg síðan við vorum fimm. 

Hver kom þér síðast á óvart og hvernig?

Kom sjálfri mér á óvart þegar ég náði að drösla mér „næstum“ upp á topp á Hvannadalshnúk í byrjun maí á þessu ári. Í fyrra hafði ég aldrei gengið á fjall en byrjaði áskorunina 52 fjöll árið 2013 í janúar.

Hvaða galla í eigin fari ertu búin að umbera allt of lengi?

Ég á það til að mikla hlutina fyrir mér og geri þar af leiðandi mér og öðrum lífið leitt. Þetta er eitthvað sem ég er markvisst að vinna í að láta af.

Ertu hörundsár?

Já, mjög svo. Ég er mikil tilfinningavera en ég er sem betur fer gædd þeim hæfileika að vera mjög fljót að jafna mig.

Hvenær gerðirðu þig síðast að fífli og hvernig?

Ég geri mig oft að fífli, enda alræmdur klaufi. Að detta í læki og polla, brjóta og bramla, rúlla niður stiga og þess háttar hefur verið mín sérgrein síðan ég man eftir mér. Þau eru svo mörg atvikin að þetta rennur bara saman í eitt.

Hringirðu stundum í vælubílinn?

Það er ekki í boði! Bíta á jaxlinn og brosa í gegnum tárin er vænlegra.

Tekurðu strætó? Nei, ég geri það alltof sjaldan og þá helst til skemmtunar fyrir dóttur mína.

Hvað eyðirðu miklum tíma á Facebook á dag?

Ég held úti Facebook-síðum fyrirtækjanna minna svo ég eyði mjög nauðsynlegum tíma þar og svo allt of miklum óþarfa tíma.

Ferðu hjá þér þegar þú hittir fræga eða heilsarðu þeim?

Ég er ekki týpan til að hlaupa fræga uppi. Brosi kannski frekar ef ég næ augnsambandi líkt og við flesta aðra. Enda frægir ekkert öðruvísi en hver annar.

Hvað ætlarðu alls ekki að gera um helgina?

Ég ætla ekki að vera löt! Ekki vera innan um fólk í vondu skapi, ekki borða vondan mat og ekki láta mér leiðast.