Tveir bátar á leið til hvalveiða í Faxaflóa

Útlit er fyrir að tveir hrefnuveiðibátar verði í Faxaflóanum í ágúst. Undanfarin ár hefur hvalveiðibáturinn Hrafnreyður verið einn á veiðum í flóanum en nú eftir helgi mun nýr bátur hefja veiðar í flóanum.

Eftir að Steingrímur J. Sigfússon, sjávarútvegs- og landbúnaðarráðherra, stækkaði bannsvæðið í Faxaflóa, hvarf Hrefna, félag hrefnuveiðimanna, með bát sinn norður fyrir land. 

En nú þegar Sigurður Ingi Jóhannsson, sjávarútvegs- og landbúnaðarráðherra, felldi ákvörðun forvera síns úr gildi huga hrefnuveiðimenn að hefja veiðar að nýju í Faxaflóanum, þó hugsanlega ekki fyrr en síðla í ágúst. 

Í tilkynningu sem Sigurður Ingi sendi frá sér á föstudag segir að með ákvörðun forvera síns hafi „hvorki verið horft til vísindalegra sjónarmiða né hagsmuna hrefnuveiða á svæðinu“.

Enn fremur segir að um áttatíu prósent hrefnunnar hafi verið veidd á svæði sem er innan friðlínu samkvæmt ákvörðun Steingríms.

„Það eru heldur engin vísindaleg rök fyrir því að minnka bannsvæðið,“ segir Rannveig Grétarsdóttir, framkvæmdastjóri Hvalaskoðunarfyrirtækisins Eldingar.

„Þetta er bara pólitík,“ bætir hún við. Hún segir að síðustu tvo mánuði hafi hrefnan verið óvenju gæf og eins hafi sést fleiri skepnur í hverri ferð.

Gunnar Bergmann Jónsson, framkvæmdastjóri Hrefnu, segir að veiðarnar fyrir norðan hafi gengið vel í ár. Þegar hafi 20 skepnur verið veiddar. Undanfarið hefur þeim verið landað á Hvammstanga og Siglufirði en þegar veitt er á Faxaflóa landar félagið í Hafnarfirði.