Stórkostlegt að hitta Simmons

Þráinn Árni Baldvinsson, gítarleikari Skálmaldar og Kiss-aðdáandi, hitti Gene Simmons, bassaleikara Kiss og aðra meðlimi rokksveitarinnar, fyrir tónleika hennar í Kaupmannahöfn á þriðjudagskvöld.

Aðdáendaklúbbur Kiss á Íslandi skipulagði hópferð á tónleikana.

„Þetta var stórkostlegt,“ segir Þráinn Árni um fundinn með Simmons. „Gene talaði fallega um land og þjóð og gaf sér góðan tíma til að spjalla og að sjálfsögðu krota á plötur fyrir mig. Það er auðvitað frábært að fá að hitta svona meistara. Hann var í miklu stuði og lék á alls oddi,“ segir Þráinn, sem var að hitta Simmons í annað sinn.

„Gene er maðurinn sem maður var pínu smeykur við í „denn“ og sögurnar sem maður heyrði um hann voru rosalegar en flestallar auðvitað ósannar. Svo er þetta bara hinn mesti öðlingur.“

Aðspurður segist Þráinn hafa skemmt sér frábærlega á sínum sjöttu Kiss-tónleikum á ævinni.

„Að sjá Kiss er alltaf stórfenglegt. Lögin eru auðvitað meiriháttar og svo spara þeir ekkert þegar kemur að sprengingum, ljósasýningu og sviðsbúnaði. Þetta er flottasta tónleikabandið.“