Láta kuldann ekki stoppa sig

Starfsfólk Skrúðgarða Reykjavíkur er nú í óða önn að undirbúa blómagarða borgarinnar undir sumarið. Það hefst auðvitað á því að gróðursetja plöntur og skera í grasbrúnir. „Það má ekki vera mikið kaldara en þetta,“ segir Eiríkur Sæland, verkstjóri skrúðgarðanna í miðborginni, um veðurfar undanfarinna daga.

Hann segist hins vegar alveg vera á áætlun. „Það er verra ef það gerir norðanhret en yfirleitt er byrjað að setja niður í lok maí ár hvert.“ Hallargarðurinn við Fríkirkjuveg er fyrsti garðurinn sem unnið er að í sumar en annars sér hópur hans um Austurvöll, Fógetagarð og Mæðragarð, stærstu blómagarða miðbæjarins.

„Eftir 1. júní er yfirleitt öruggt að setja niður blóm,“ segir Eiríkur um árstíðabundið veður. Ekki er útlit fyrir að það hlýni mjög á næstu dögum. Í lok vikunnar á svo að rigna um nær allt land.-