Bar hlutverkið fyrst undir foreldra sína

Svandís Dóra Einarsdóttir fer með hlutverk í leikritinu Hvörfum sem fjallar um Guðmundar- og Geirfinnsmálið. Hún er dóttir Einars Bollasonar, sem sat saklaus í einangrun í 104 daga við rannsókn málsins. „Rúnar Guðbrandsson leikstjóri hringdi í mig og spurði hvort ég vildi vera með,“ segir Svandís Dóra, sem þurfti að hugsa sig um í dálítinn tíma. Hún ákvað fyrst að bera málið undir foreldra sína. „Þau vissu ekkert að það ætti að setja þetta upp og að sjálfsögðu brá þeim svolítið. En þau sögðu að þetta mál væri búið og að þau treystu mér. Ég treysti líka fólkinu sem ég er að vinna með til að búa til góða sýningu. Þegar ég sá hvernig það nálgaðist þetta og hvað það ætlaði að gera með þetta mál sannfærðist ég.“ Rithöfundurinn Sjón skrifar handritið í samvinnu við Stefán Hall Stefánsson og leikstjórann Rúnar. Auk Svandísar Dóru eru í leikhópnum Ólafur Darri Ólafsson, Árni Pétur Guðjónsson, Birna Hafstein, Arnar Jónsson, Friðrik Friðriksson og Stefán Hallur Stefánsson. Guðni Franzson sér um tónlistina og Eva Signý Berger hannar leikmynd. Sýningin verður sett á fjalirnar í Þjóðleikhúsinu 4. maí. Að sögn Svandísar Dóru byggir leiksýningin fyrst og fremst á staðreyndum úr skýrslunum í tengslum við málið. „Mér fannst flott að þeir eru ekki að búa til neina píslarvætti eða leggja neinn dóm á eitt eða neitt. Það er bara verið að skapa sýningu út frá staðreyndum.“ Persóna Einars, föður hennar, kemur við sögu í sýningunni en nöfn hans eða annarra í tengslum við málið koma ekki fram. „Þeir eru þarna fjórmenningarnir, krakkarnir, lögreglan og yfirvöld.“ Svandís Dóra var ekki fædd þegar atburðirnir áttu sér stað árið 1976. Hún kom ekki í heiminn fyrr en átta árum síðar. Aðspurð segist hún ekki kvíða sérstaklega fyrir hlutverkinu þrátt fyrir að það standi henni mjög nærri. „Maður fær alltaf hnút í magann fyrir hverja sýningu, hvort sem það er þessi eða einhver önnur. Ég nálgast þetta eins og allar mínar sýningar. En þarna verður margt sem mun koma fólki á óvart.“