Draga í efa að fylgt sé ákvæði virkjanaleyfis

„Í ljósi gagna sem liggja fyrir viljum við skoða hvort þarna sé hugsanlega pottur brotinn,“ segir Gunnar Jónsson, formaður bæjarráðs Fljótsdalshéraðs, sem vill láta skoða hvort skilmálum virkjanaleyfa Kárahnjúkavirkjunar og Lagarfossvirkjunar sé fylgt.

Gunnar segir virkjanaleyfi kveða á um vatnsmagn og vatnsstöðu. „Við viljum að það sé farið yfir hvort það sé verið að brjóta þetta eða ekki. Ég ætla ekki að fullyrða það en við viljum ræða þetta,“ segir hann.

Gerður Björk Kærnested hjá Landsvirkjun segir enga skilmála í virkjanaleyfi Kárahnjúkavirkjunar um magn vatns. „Landsvirkjun telur sig vera að uppfylla öll skilyrði virkjanaleyfis en samkvæmt skilmálum virkjanaleyfis ber fyrirtækinu að fylgjast með breytingum á rennsli og vatnshæðum,“ segir hún.

Bæjarráðið vill að Hörður Arnarson, forstjóri Landsvirkjunar, fundi með fulltrúum Fljótsdalshéraðs. Gerður Björk segir að forstjórinn muni bregðast vel við slíkri beiðni.

Tryggvi Þór Haraldsson, forstjóri RARIK, segir að fyrir utan að ekki hafi náðst að loka samningum við landeigendur vegna Lagarfossvirkjunar séu skilmálar virkjanaleyfis þar uppfylltir.

Bæjarráð Fljótsdalshéraðs vill einnig fund með fulltrúum Orkustofnunar til að fara yfir skilmála virkjanaleyfa Kárahnjúkavirkjunar og Lagarfossvirkjunar sem RARIK rekur. Skúli Thoroddsen, lögfræðingur hjá Orkustofnun, segir stofnunina hafa kallað eftir skýrslu Landsvirkjunar um vatnsstöðuna í Lagarfljóti til að bera saman við skilmála virkjanaleyfisins. „Það er ekki hægt að tjá sig um málið fyrr en þessi skýrsla liggur fyrir,“ segir Skúli.

Landsvirkjun var beðin að svara spurningum sem Gunnar Jónsson setti fram í Fréttablaðinu á þriðjudag um vatnsmagn sem er umfram áætlun í Lagarfljóti. Það séu þrjátíu rúmmetrar á sekúndu. „Hvað framleiða þessir aukalítrar mikið af rafmagni og peningum fyrir Landsvirkjun?“ spurði Gunnar.

„Það er erfitt að leggja mat á það og getum við því miður ekki gefið nein svör að svo stöddu,“ svarar Gerður Björk.