Ég fékk martraðir um vítið í Finnlandi

Stelpurnar okkar stigu sögulegt skref í gær í fyrsta leik sínum á EM í Svíþjóð. Íslenska liðið gerði þá 1-1 jafntefli við Noreg og liðið er því strax búið að gera betur á sínu öðru Evrópumóti en fyrir fjórum árum í Finnlandi þegar allir þrír leikirnir töpuðust.

Úrslitastund leiksins var vítaspyrna sem Sara Björk Gunnarsdóttir fékk fjórum mínútum fyrir leikslok. Á punktinn steig Margrét Lára Viðarsdóttir og skoraði af öryggi og hreinsaði hugann endanlega af fortíðardraugum.

Fékk martraðir eftir vítaklikkið

„Þetta víti er búið að sitja mikið í mér og mér fannst ég skulda stelpunum þetta. Ég var mjög miður mín eftir vítið á EM 2009 og ég grínast ekki þegar ég segi að ég hafi fengið martraðir um það nokkrum sinnum. Ég lét það ekki á mig fá og var bara mjög einbeitt,“ sagði Margét Lára Viðarsdóttir um vítaspyrnuna sem hún lét verja frá sér í 1-3 tapi á móti Frakklandi í fyrsta leik á EM 2009.

„Margrét Lára tók víti á móti Frakklandi í fyrsta leik fyrir fjórum árum og klikkaði. Hún hefur örugglega hugsað um það í einhverja mánuði á eftir. Það var virkilega ljúft að sjá hana setja boltann örugglega í netið. Hún sagði í viðtölum að hún þyrfti að kenna Svíunum hvernig ætti að taka vítin því þeir klúðruðu tveimur vítum á móti Dönum,“ sagði Sigurður Ragnar Eyjólfsson, þjálfari íslenska liðsins. Margrét Lára lærði vissulega af mistökum Svíanna.

„Ég sá hvernig Svíarnir brugðust við vítaspyrnunum sem þær fengu í gær. Þær voru taugaveiklaðar þegar þær fóru á punktinn. Ég vissi að myndavélarnar væru á mér og ákvað að brosa og vera létt. Ég hef tekið víti á þessa stelpu áður. Það er bara að hugsa ekki neitt og einbeita sér að því að njóta mómentsins. Þegar maður er kominn með svona mikla reynslu þá eru þetta mómentin sem maður vill fá. Ég hafði mjög gaman af þessu,“ sagði Margrét Lára. Sigurður Ragnar var ekki eins rólegur. „Ég var örugglega miklu stressaðari en hún. Hún leysti þetta ótrúlega vel,“ sagði Sigurður Ragnar.

Gott að koma til baka

Íslenska liðið var í vandræðum í fyrri hálfleik en kom öflugt til baka og tók öll völd í seinni hálfleiknum.

„Þetta var slysalegt mark sem við fengum á okkur en við sýndum virkilega góðan karakter að koma til baka. Við erum á stórmóti og það er svolítið pressa á okkur. Mér fannst við sýna reynsluna í þessu liði. Fyrir fjórum árum hefðum við örugglega dottið í stress og ég er ekki viss um að við hefðum unnið okkur út þessum aðstæðum þá,“ sagði Margrét Lára og bætti við:

„Mér fannst við keyra yfir þær í seinni hálfleik, erum í miklu betra formi en þær og vorum að búa til flottar sóknir. Það vantaði svolítið að reka smiðshöggið á þetta en við vinnum í þeim þáttum núna. Vonandi getum við komið svolítið á óvart á móti Þjóðverjum,“ sagði markaskorarinn.

Liðið tók mörg stór skref í gær að mati landsliðsþjálfarans. „Þetta var frábær seinni hálfleikur. Við fengum reyndar á okkur þetta mark í fyrri sem ég var ósáttur með en við unnum okkur inn í leikinn á móti góðu liði í lokakeppni. Þetta voru allt stór skref fyrir okkur,“ sagði Sigurður Ragnar.