Heimsfrægur grínisti á Íslandi

Bandaríski grínistinn Jeff Dunham kemur fram á tveimur uppistandssýningum í Laugardalshöll á föstudag. Grínistinn kemur til landsins á morgun ásamt fríðu föruneyti. „Yfirleitt mætir hann til þeirra staða sem hann kemur fram á samdægurs, en hann vildi koma hingað fyrr sökum mikils áhuga á landinu,“ útskýrir Ísleifur B. Þórhallsson, markaðsstjóri Senu, en fyrirtækið skipuleggur viðburðinn.



Samkvæmt heimildum Fréttablaðsins er kröfulisti Dunhams ekki langur en hann fer þó fram á að fæðan baksviðs sé holl og góð. Eiginkona grínistans fylgir honum til landsins en hún starfar sem einkaþjálfari.



Dunham hefur öðlaðist frægð á vefsíðunni Youtube og þykir það magnað að maður sem ekki kemur fram í sjónvarpsþáttum sem sýndir eru á Íslandi nái að fylla Laugardalshöllina tvisvar sama kvöld.



„Þetta er sennilega stærsti grínisti í heiminum í dag, hann fyllir hverja tónleikahöllina á fætur annarri, ég man ekki eftir að það hafi orðið svona svakalega uppselt á mínum ferli,“ segir Ísleifur um sýningar Dunhams.



Enn eru til örfáir miðar á aukasýninguna á föstudagskvöld en hægt er að nálgast miða á vefsíðunni Midi.is.