Sjálfhverfa Y-kynslóðin

Kynslóðin sem fædd er á tímabilinu 1975-1995 er kölluð Y-kynslóðin í grein á Huffingtonpost.

Þar er sagt að þessi kynslóð eigi erfitt með að finna hamingjuna því að væntingar til lífsins eru alltaf meiri en raunveruleikinn hefur upp á að bjóða.

Í greininni er kynslóðinni lýst sem sjálfhverfum snobbhænum sem hafa þá sjálfsmynd að vera algjörlega einstakar.

Greinarhöfundur útskýrir að eldri kynslóðir hafi lært að til þess að ná árangri í lífinu þurfi að leggja sig allan fram. Maður uppskerir eins og maður sáir. Einnig að kynslóðir á undan hafi fundið til sameiningar, unnið fyrir hag landsins og samfélagsins.

Y-kynslóðin hefur aftur á móti alist upp við það að þau séu svo einstök að þau eigi að fá hraðan frama, að allir draumar eigi að rætast og þau séu aðalatriðið í öllu því sem þau taka sér fyrir hendur, án þess jafnvel að hafa mikið fyrir því.

Í greininni er sagt að þeir sem tilheyra Y-kynslóðinni:

Séu óeðlilega metnaðarfullir:

Öryggi og hagsæld dugar ekki, það er of venjulegt. Y-kynslóðin vill upplifa sinn eigin persónulega draum þar sem þeir eru sjálfir í aðalhlutverki.

Lifi í blekkingu:

Y-kynslóðin sættir sig ekki við meðalmennsku. Allir halda að þeim sé ætlað eitthvað einstakt í lífinu. Einstakur þýðir að vera betri, meiri eða ólíkur hinum. Eðli málsins samkvæmt getur ekki heil kynslóð verið einstök, því þá missir orðið merkingu sína.

Jafnvel núna hugsa þeir sem tilheyra Y-kynslóðinni: „Þetta er rétt, en ÉG er samt einn þeirra fáa sem er raunverulega einstakur.“

Séu sífellt minntir á að þeim hafi mistekist:

Samfélagsmiðlarnir minna Y-kynslóðina sífellt á að öllum öðrum gangi vel enda tjáir fólk sig yfirleitt aðeins um það jákvæða og gefa oft skakka mynd af lífi sínu.

Greinarhöfundur gefur Y-kynslóðinni eftirfarandi ráð til að fanga hamingjuna:

1) Haltu áfram að vera metnaðarfullur. Þeir fiska svo sannarlega sem róa.

2) Hættu að líta á sjálfan þig sem einstakan. Þú ert ekki einstakur.

3) Hundsaðu alla aðra og ekki vera öfundsjúkur - hinir eru í nákvæmlega sömu sporum og þú.