Samstarfsverkefni Barða í Bang Gang og JB Dunckel úr Air komið á fullt

Fyrsta tónlistarmyndband hljómsveitarinnar Starwalker verður frumsýnt á Íslandi á föstudaginn næsta á Vísi.

Starwalker er samstarf hins íslenska Barða Jóhannssonar, oftast kenndur við Bang Gang, og JB Dunckel, eins forsprakka hinnar geysivinsælu rafhljómsveitar Air. Þeir gáfu út fyrsta lag sitt saman fyrr í vikunni, en lagið ber heitið Bad Weather og má hlusta á hér að neðan. 

„Myndbandið var allt tekið upp á Íslandi. Það var skotið af Sævari Guðmundssyni, sem leikstýrði því ásamt ljósmyndaranum Jeaneen Lund. Við erum mjög ánægðir með afraksturinn,“ segir Barði.

Hljómsveitin Air nýtur mikilla vinsælda um allan heim en hún spilaði í Laugardalshöll árið 2007. Önnur breiðskífa hennar, Moon Safari, fór mikinn á vinsældarlistum um allan heim, en hljómsveitin gat sér einnig gott orð fyrir að semja tónlist við mynd Sofiu Coppola, The Virgin Suicides.

Barði og Dunckel kynntust fyrir tilstilli sameiginlegrar vinkonu í París auk þess sem Bang Gang hitaði upp fyrir Air á tvennum tónleikum í Frakklandi fyrir nokkrum árum.

„Við höfum verið að hittast og semja í kannski eitt og hálft ár. Þetta hefur verið langt ferli, en skemmtilegt. Samstarfið gengur rosalega vel,“ segir Barði.

„Planið er núna að gefa út fjögurra laga smáskífu í febrúar og svo stefna á að klára fulla plötu á næsta ári,“ segir Barði að lokum.