Líf með og án kolvetna

Listin að velja – ráðstefna um heilsu og holdafar fer fram í Salnum í Kópavogi í dag. Félag fagfólks um offitu stendur fyrir ráðstefnunni og eru fjölmörg áhugaverð erindi á dagskrá. Fyrir hádegi mun fagfólk sem stundar rannsóknir á offitu kynna þær og niðurstöður sínar en eftir hádegi verða fjölbreyttir fyrirlestrar ætlaðir öllum sem hafa áhuga á heilbrigðum lífsstíl á dagskrá.

Þær Anna Sigríður Ólafsdóttir, dósent í næringarfræði á menntavísindasviði Háskóla Íslands og Ingibjörg Gunnarsdóttir, prófessor í sama fagi á heilbrigðisvísindsviði, flytja til að mynda erindi sem ber yfirskriftina Kúrar og kolvetni – heilsa eða hætta? klukkan 14.30. „Við ætlum að ræða líf með og án kolvetna í sinni víðustu mynd en kolvetnasnauðir kúrar hafa verði ofarlega á baugi að undanförnu. Við ætlum að horfa sérstaklega á frúktósann eða ávaxtasykurinn og taka fyrir hvort hann sé tengdari offitu en annar sykur. Þá komum við inn á kolvetnasnauðu kúrana, föstur og nýjar norrænar næringarráðleggingar sem verða kynntar í byrjun október.“

En gera kolvetnin okkur feit? „Þetta snýst allt um samsetningu, magn og gæði. Við þurfum til að mynda mörg að auka trefjaneysluna en til þess að ná því markmiði þarf að innbyrða kolvetnarík matvæli. Fólk þarf því að geta fetað einhvern meðalveg og lært bæði að temja sér hóf og huga að gæðum matvæla. Umfram allt leggjum við þó áherslu á að fólk leitist eftir einstaklingsmiðuðum ráðleggingum hjá fagfólki í heilbrigðisstéttum. Það sama hentar ekki öllum og það er meira en að segja það að ætla í sífellu að hlaupa á eftir nýjum og nýjum kúrum og að gera hlutina alfarið upp á eigin spýtur. Þetta er flóknara en svo og þarf að skoða útfrá öllum hliðum. Það er engin töfralausn til,“ segir Anna Sigríður.

Hún segir allflesta kúra snúast um að sleppa einhverju; annað hvort ákveðnum fæðutegundum eða að sleppa því að borða yfirleitt. „Þeir miða þó að því sama og hefðbundnar ráðleggingar fyrir fólk sem vill léttast - að það nái að fækka hitaeiningum. Spurningin er hins vegar hvernig fólk ætlar að halda út og skapa sér lífsstíl sem hentar,“

Meðal annarra erinda á ráðstefnunni má nefna fyrirlestur Guðlaugs Birgissonar, sjúkraþjálfara á offitu – og næringarsviði Reykjalundar um langtímaárangur af offitumeðferð á Reykjalundi og erindi Tryggva Þorgeirssonar, læknis og lýðheilsufræðings, Skynsemin ræður – eða hvað?.

Nánari upplýsingar er að finna á www.ffo.is. Ráðstefnan stendur frá 9 til 16.30 en ýmist er hægt að sækja hana alla eða hálfan daginn.