Heimsfrægur sverðgleypir sýnir á Íslandi

Sverðgleypirinn Dan Meyer vakti mikla kátínu þegar hann leit við í höfuðstöðvum 365 í gær. Meyer verður heiðursgestur á Heimsmetadegi Ripley's sem fram fer í kvöld í Háskólabíó. Meyer er heimsfrægur skemmtikraftur og hefur ferðast út um allan heim og sýnt listir sínar. Hann leit við á fréttastofu 365 í gær og gleypti m.a. sverð og garðklippur svo eitthvað sé nefnt.

„Ég er mjög ánægður með að vera kominn til Íslands og mun halda sýningu í Háskólabíó í dag. Ég vil sýna Íslendingum að þú getur gert hið ómögulega. Það er ekkert sem er ómögulegt,“ segir Meyer.

„Ég byrjaði að gleypa sverð fyrir 16 árum síðan. Ég heyrði af því árið 1997 að það væru færri en 12 sverðgleypar í öllum heiminum. Þetta var eitthvað sem ég taldi mig þurfa að gera. Ég byrjaði í kjölfarið að æfa mig 10-12 sinnum á dag í fjögur ár. Ég var búinn að reyna 13 þúsund sinnum áður en mér tókst að koma sverðinu niður hálsinn í fyrsta sinn árið 2001.“