Lærir spurningarnar utan að

„Þetta er mjög gaman og áhuginn fyrir þættinum hefur verið mikill,“ segir Sigurjón Magnús Egilsson, þáttastjórnandi á Bylgjunni. Þátturinn fagnar fimm ára afmæli á morgun, en sama dag fer í loftið 250. þátturinn.

Í þættinum er tekið á hinum ýmsu samfélagsmálum og hefur hann notið gríðarlegra vinsælda. „Undirbúningurinn er stóra málið í þessu, það er algjört lykilatriði að vera vel undirbúinn, ég læri líka spurningarnar utan að svo ég geti náð góðu augnsambandi við viðmælendur mína,“ útskýrir Sigurjón.

Sigurjón hafði örlitla reynslu af útvarpi áður en þátturinn hóf göngu sína, meðal annars á Talstöðinni árið 2003 og þegar hann var vikulegur gestur í Bítinu, þar sem hann fór yfir fréttir vikunnar.

„Formið hefur gengið vel og þess vegna ættu ekki að vera neinar breytingar í nánd,“ segir Sigurjón um framhaldið.

Afmælisþátturinn fer í loftið klukkan 10 á sunnudag og er Kári Stefánsson, forstjóri Íslenskrar erfðagreiningar, á meðal viðmælenda í þættinum.