"Allar konur eiga að mála sig"

Kristín Stefánsdóttir förðunarmeistari hefur skrifað förðunarbókina Förðun-skref fyrir skref og Lífið fékk að skyggnast á bak við tjöldin.

„Ég er búin að ganga með þetta verkefni í maganum í mörg ár. Mér finnst mikilvægt að konur læri að farða sig á einfaldan og fljótlegan máta. Þarna er ég að kenna förðun og umhirðu húðarinnar á einfaldan og skilmerkilegan hátt og hvernig við förum í þessa grunnförðun sem ég er alltaf að predika að allar konur eigi að sinna,“ segir Kristín Stefánsdóttir, snyrti-og förðunarmeistari og rithöfundur bókarinnar Förðun – skref fyrir skref.

Bókin kemur í verslanir í byrjun október en að sögn Kristínar er öll förðunarflóran tekin fyrir í þessari íslensku bók en í henni er kennd fimm mínútna förðunin, sem ætti að gagnast flestum konum, kvöldförðun, brúðarförðun, „smokey“ og fleira mætti telja. Kristín hefur starfað sem förðunarmeistari í yfir þrátíu ár og stofnaði meðal annars förðunarskólann No Name árið 1997 auk þess sem hún hefur haldið fjölda námskeiða í förðun.

„Silla Páls tók myndirnar en þetta eru yfir 200 myndir og það liggur gríðarleg vinna í bókinni. Ég var með æðislegt samstarfsfólk í þessu; hárgreiðslufólk og stílista. Mörg módelin hafa aldrei setið fyrir áður og útkoman er mjög fjölbreytt og skemmtileg.”

Þegar hún er að lokum spurð út í framtíðaráform sín segir hún mörg spennandi verkefni fram undan. „Ég er að opna nýtt förðunarstúdíó þar sem boðið verður upp á stutt og hnitmiðuð námskeið í grunnatriðum í förðun. Einnig verður boðið upp á námskeið fyrir fagfólk þar sem erlendir förðunarmeistarar verða fengnir til að kenna það sem er nýjast og ferskast hverju sinni.“ segir hún að lokum.