Gagnrýndu nýja ríkisstjórn harðlega á Bessastöðum

Það var annasamur dagur á Bessastöðum í dag þegar stjórnarskiptin gengu í gegn. Dagurinn hófst á því að ráðherrar úr ríkisstjórn Jóhönnu Sigurðardóttir mættu á ríkisráðsfund.

Fráfarandi ríkisstjórn mætti til Bessastaða á ríkisráðsfund klukkan ellefu í morgun. 

Jóhanna segist hissa á því hve nýr stjórnarsáttmáli virðist óljós og ómarkviss. „Ég minni á það að mín ríkisstjórn setti sér hundrað daga áætlun þegar hún tók við fyrir rúmum fjórum árum síðan, með 48 verkefnum sem hún framkvæmdi flest öll. Ég vona að það verði eins mikill kraftur í þessari ríkisstjórn og þessari sem er að fara frá.“

Hún bætti svo við: „Þeir ætla skipa, tæplega 20 nefndir. Þeir sögðu engar nefndir bara aðgerðir strax þess vegna var ég svolítið hissa á því."

Þá sagði Jóhanna að henni þættu það nokkur vonbrigði að sjá ekki meira afgerandi áætlun um hvað eigi að gera í tenglsum við skuldavandamál heimilanna enda hafi margir verið stórorðir um þau í kosningabaráttunni. 

Steingrímur J. Sigfússon sem mætti til forsetans á sínum gamla Volvó hafði þetta að segja.

„Það vantar alla útfærslur og í hann vantar allt um ríkisfjármál og ríkisfjármálaáætlun til næstu ára. Það er nú það sem ég mun horfa mest á, hvernig tekst að halda áætlanir í þeim efnum og það er býsna krefjandi verkefni að skila hallalausum fjárlögum með afgangi á næsta ári.“

Svandís Svavarsdóttir, fyrrverandi umhverfisráðherra, segir stefnu nýrrar ríkisstjórnar í umhverfismálum loðna eins og annað í stjórnarsáttmálanum.

„Það er ekki eins einfalt og menn tala um því það þarf væntanlega lagabreytingu til. Þingsályktun þessarar rammaáætlunar er í samræmi við núgildandi lög, sem þeir reyndar samþykktu sjálfir. Þannig þeir þurfa aðeins að rifja upp sýnar eigin ákvarðanir í þinginu.“

Katrín Júlíusdóttir, fyrrverandi fjármálaráðherra, sagði ýmislegt í stjórnarsáttmálanum lofa góðu. „En það kom mér á óvart hve mikið er óklárt og hversu mikið á að fara í nefndir og starfshópa og hversu margar úttektir á eftir að gera. Það kom mér á óvart svona miðað við það hve menn voru kokhraustir í kosningabaráttunni og klárir á málunum þá þannig ég hélt nú að menn væru tilbúnari en þetta," sagði Katrín.

Ögmundur Jónasson, fyrrverandi innanríkisráðherra, segist ekkert valda sér vonbrigðum annað en að umhverfisráðuneytið hafi verið sameinað öðrum ráðuneytum en.

„Ég hafði búist við miklu markvissara plaggi en jafnframt er boðað að útfærslan liggi nánar fyrir í byrjun þinghalds á fyrstu dögum júnímánaðar. Þannig þá sjáum við hvað hangir á spýtunni.“

Össur Skaphéðinsson, fyrrverandi utanríkisráðherra tók í svipaðan streng, margt gott væri að finna í nýjum stjórnarsáttmála meðal annars þeirri stefnu sem tekin væri varðandi Drekasvæðið.

„En vitaskuld er vík á milli vina í einu máli og hefur verið og það eru Evrópumálin. Ég vildi fara aðra leið en þessa en ég hins vegar bíð eftir því að þeir efni það loforð sem þeir hafa gefið um að það verði þjóðaratkvæðagreiðsla. Það er það sem skiptir langmestu máli, það er að fólkið fái sjálft að ráða."

Ráðherrarnir fyrrverandi settust því næst til fundar og snæðings með Ólafi Ragnari Grímssyni, forseta Íslands og voru þar staðfest lög og stjórnvaldsaðgerðir ráðuneytis Jóhönnu Sigurðarsdóttir sem formlega lét af embætti í dag.