Skipting ráðuneyta eftir en málefnin frá

Málefnavinnu er að mestu lokið í viðræðum Sigmundar Davíðs Gunnlaugssonar, formanns Framsóknarflokksins, og Bjarna Benediktssonar, formanns Sjálfstæðisflokksins. Síðustu tvo daga hafa þeir farið yfir reynsluna af sameiningu ráðuneyta. Heimildir Fréttablaðsins herma að ráðherrum verði fjölgað um tvo og verkefnum ráðuneyta skipt upp á ný.

Jóhannes Þór Skúlason, aðstoðarmaður Sigmundar Davíðs, segir að á þriðjudag hafi viðræðurnar að mestu snúist um reynsluna af sameiningu ráðuneyta og því hafi verið haldið áfram í gær. Verið sé að skoða hvað sé fýsilegt varðandi uppskiptingu verkefna og fjölgun ráðherra. „Það er verið að skoða hvort það sé skynsamlegt og hvernig verkefnin hafa unnist eftir sameininguna. Verið er að skoða reynsluna í þessum stóru ráðuneytum sem hafa verið sameinuð.“

Ekki hefur verið tekin ákvörðun um uppskiptingu, en samkvæmt heimildum Fréttablaðsins er nánast öruggt að verkefnum velferðarráðuneytisins verði skipt á milli tveggja ráðherra. Þá yrði heilbrigðisráðherra og ráðherra annarra málefna, hver svo sem titill hans verður, innan sama ráðuneytisins. Atvinnuvegaráðuneytið er hitt stóra ráðuneytið sem verið er að skoða, þegar kemur að fjölgun ráðherra, en einnig innanríkisráðuneytið. Jóhannes segir að ekki sé byrjað að ræða skiptingu ráðuneyta á milli flokka. Formennirnir hafa kallað til sín embættismenn og fengið upplýsingar um stöðu mála.

Tvennum sögum fer af því hvort þeir hafa þegar rætt við einhverja úr atvinnulífinu, en það mun vera á dagskrá.