María Krista með LKL námskeið í Salt Eldhúsinu

Matgæðingurinn og grafíski hönnuðurinn María Krista Hreiðarsdóttir heldur námskeið í Salt Eldhúsinu.

Þetta er búið að spinnast mikið út frá blogginu mínu, en ég byrjaði að pósta myndum af matnum mínum því ég var sjálf í átaki.

Það varð til þess að fólk tók eftir þessu og ég hef fengið þó nokkrar fyrirspurnir síðan,“ segir María Krista sem nú heldur lágkolvetna matreiðslunámskeið í Salti eldhúsi.

„Auður sem rekur Salt eldhús hafði samband því hún sá að fólk var að sækjast eftir leiðbeiningum með þessum lágkolvetna hráefnum sem geta stundum verið svolítið flókin. Við hönnuðum svo námskeið saman en fólk lærir heila fjórtán rétti á námskeiðinu, bæði veislurétti og bakstur.“

María Krista segist hafa byrjað að sanka að sér glútenfríum og sykurlausum uppskriftum þegar tvö af þremur börnum hennar greindust með glútenofnæmi. Fjölskyldan ákvað í kjölfarið að breyta mataræðinu enda þótti líklegt að foreldrarnir væri einnig viðkvæmir fyrir glúteni. Nýja fæðinu tók María Krista fagnandi en hún var sjálf í átaki með nýjum og betri lífsstíl.

„Þegar strákurinn minn fæddist var ég orðin 100 kílóa kerling, í Crocs-skóm og flíspeysu. Ég ákvað loksins að taka mig á og léttist um 30 kíló á danska kúrnum á einungis sjö mánuðum. Í dag reyni ég að halda fæðinu hveitilausu, án glútens og sykurlausu.“

María Krista er menntuð sem grafískur hönnuður og hefur nóg fyrir stafni en hún rekur kristadesign.is og selur vörur sínar meðal annars í blómabúðir, Epal, Hrím og Volcano.

„Það er svo gaman að geta samnýtt áhugann á góðum uppskriftum og vinnuna mína og því ákvað ég að útbúa fallega og pena uppskriftastanda sem innihalda uppskriftir sem hægt er að kaupa og jafnvel gefa í gjafir.“ Næstu námskeið í Salt eldhúsi eru dagana 12. og 19. október en skráning fer fram á info@salteldhus.is. 

Snickers-bitar



20 gr. kókosflögur

80 gr. hýðislausar möndlur

80 gr. pekanhnetur

20 gr. sesammjöl Funksjonell

½ dl kókosolía

½ dl hnetusmjör

1 tsk. Bourbon vanilluduft eða vanilludropar

¼ tsk. sjávarsalt

3 msk. Sukrin Melis

10 dropar Via Health Stevíudropar

Ristið á pönnu kókosflögur, möndlur og pekanhnetur þar til gylltar, þarf ekki langan tíma.

Blandið saman í skál, kókosolíu og hnetusmjöri og bræðið í örbylgjuofni, má líka nota skaftpott og hita á hellu. Blandið vel saman og bætið við sukrin, vanilludufti, salti og stevíu.

Setjið volgar hneturnar í matvinnsluvél í stutta stund þar til allt er grófmalað, bætið svo við sesammjölinu og maukið áfram.

Að lokum fer kókosolíublandan út í og aftur maukað þar til áferðin er eins og gróft hnetusmjör.

Setjið „deigið“ í þunnan bakka með smjörpappír og þrýstið út í hliðarnar.

Frystið í 20 mín. og búið til súkkulaði á meðan.

Súkkulaðikrem

35 gr. af 85% súkkulaði

2 msk. ósaltað smjör eða 2 msk. kókosolía

1 msk. Sukrin Melis

5 dropar vanillustevía Via Health

1 tsk. rjómi

Hitið þetta saman í potti eða örbylgju og hrærið vel í til að allt leysist vel upp. 

Takið hnetustykkið úr frysti og hellið súkkulaðinu hratt og örugglega yfir. Dreifið úr og kælið aftur í 20 mín.