Kínverjar sammála Íslendingum um Miðleiðina

Kínverjar telja mögulegt að innan sjö ára, eða árið 2020, geti Miðleiðin yfir Norðurpólinn frá Kyrrahafi til Norður-Atlantshafsins orðið farvegur vöruflutninga frá Kína til Evrópu sem svari til 700 milljarða Bandaríkjadala.

Þetta kemur fram í tilkynningu frá utanríkisráðuneytinu. Ætla Kínverjar að Miðleiðin verði fær allt að fjóra mánuði á ári og 10% vöruflutninga þeirra til Evrópu geti farið fram á þeirri leið.

„Það skiptir Ísland gríðarmiklu máli að Kínverjar skuli sammála okkur um gildi Miðleiðarinnar, því hún gæti bæði haft mjög mikil efnahagsleg áhrif á Íslandi, en ekki síður stóraukið geópólitiskt vægi Íslands á nýjan leik, bæði gagnvart Evrópu, Ameríku og Asíu. Við höfum stöðugt haldið því fram að þessi leið sé heppilegust vegna ýmissa ástæðna. Ekki síst strauma og ísþykktar og það hefur mjög mikla þýðingu fyrir Ísland að stórveldið Kína sé á sama máli," segir Össur Skarphéðinsson, utanríkisráðherra.

Össur fundaði með Huigen Yang, yfirmanni Kínversku Heimskautastofnunarinnar, sem staðsett er í Shanghai. Þeir ræddu m.a. þá miklu möguleika sem felast í siglingum yfir Norðurpól í kjölfar bráðnunar ísþekju Norður-Íshafsins. Hún stytti leiðina milli hafna við Kyrrahaf og Atlantshaf um allt að 40%. Bæði Íslendingar og Kínverjar séu sammála um að Miðleiðin sé heppilegasta leiðin milli meginlandanna en með notkun hennar geti opnast miklir möguleikar á alþjóðlegri vöruhöfn á Íslandi.

Kínverski rannsóknarísbrjóturinn Snjódrekinn, sem heimsótti Ísland sl. sumar, sigldi Miðleiðina til baka. Huigen Yang telur að árið 2020 muni leiðin verða fær fjóra mánuði á ári, þó hugsanlega þurfi ísbrjóta til að opna hana. Fram kom, að Kínverjar undirbúa nú smíði nýs rannsóknarísbrjóts sem hannaður er af Finnum.

Össur og Huigen Yang ræddu einnig áform um stofnun sameiginlegrar rannsóknarstofnunar um norðurljós hér á landi, en samningur um samstarf Íslands og Kína í norðurslóðarannsóknum var undirritaður í heimsókn Wen Ji Bao, forsætisráðherra Kína á síðasta ári.