Lifrarbólga rakin til frosinna berja

Þrjátíu tilfelli af lifrarbólgu A hafa komið upp í Danmörku að undanförnu og er talað um faraldur. Rannsókn hefur leitt í ljós að uppruni smits getur verið frosin ber sem notuð hafa verið ósoðin í drykki (smooties), eftirrétti og kökur. Á vef Matvælastofnunar kemur fram að ekki hefur enn verið hægt að benda á ákveðna tegund berja en rannsókn er í gangi.

Danska matvælastofnunin ráðleggur neytendum nú að sjóða öll ber sem nota á í drykki, eftirrétti og kökur. Matvælastofnun hefur áður ráðlagt neytendum að sjóða hindbær og á umbúðum hindberja sem eru á markaði hér eru ráðleggingar þar að lútandi.

Á vef Matvælastofnunar segir að í ljósi þess að hérlendis eru sambærilegar vörur á markaði og í Danmörku og vinsælt er að nota frosin ber í drykki sé fólki ráðlagt að sjóða öll frosin ber í minnst eina mínútu áður en þau eru notuð í drykki og aðra rétti sem ekki eru hitaðir.