Líkir útvarpsþættinum við bolla af latte

Leikararnir Jóhannes Haukur Jóhannesson og Rúnar Freyr Gíslason stýra útvarpsþættinum Bakaríið sem hefur göngu sína á Bylgjunni á laugardag. Þetta er í fyrsta sinn sem þeir félagar reyna fyrir sér í útvarpi.

Í þættinum munu þeir fjalla um stjórnmál og málefni líðandi stundar af jákvæðni og einlægni. „Simmi og Jói voru með þetta „slott“ í mörg ár, en nú vinna þeir við að steikja hamborgara og því þurfti einhver að leysa þá af. Ef ég ætti að líkja þættinum við eitthvað þá væri það latte; uppistaðan er sterkur espressó en svo er drykkurinn einnig froðukenndur,“ útskýrir Jóhannes Haukur.

Spurður út í nafn þáttarins segir hann góða vinkonu sína úr Hafnarfirði hafa átt uppástunguna. „Okkur þótti nafnið jákvætt og skemmtilegt. Og svo fer maður gjarnan í bakaríið um helgar.“

Leikurunum er vel til vina og kynntust þeir fyrst þegar Rúnar Freyr leikstýrði Jóhannesi í söngleiknum Hárinu. „Við lékum svo par í verkinu Patrekur 1,5 og þar kysstumst við alls 53 sinnum. Þegar menn hafa verið svo innilegir þá verða þeir góðir vinir.“

Bakaríið verður á dagskrá á hverjum laugardegi á milli klukkan 9 og 12 og þó það verði til þess að Jóhannes missi af morgunsjónvarpinu með börnum sínum segir hann starfið nokkuð barnvænt. „Ég missi af Dóru og Klossa, en í raun er starfið mjög barnvænt því ég get verið með börnin á starfsdögum og sótt þau í leikskólann,“ segir hann að lokum.