Netníðingarnir sem þykjast betri en konur meðal annars frá Húsavík

Búið er að finna þá einstaklinga sem stóðu að baki Facebook-síðunni "Karlar eru betri en konur". Samkvæmt norðlenska fréttablaðinu, Akureyri vikublað, þá fann Þórlaug Ágústsdóttir með aðstoð félaga sinna, þá sem stóðu að baki síðunni, sem miðaði að því að gera lítið úr konum.

Í ljós kom að þeir sem standa að baki síðunni eru ungmenni á aldrinum 15-20 ára. Flestir eru þeir búsettir í heimahúsi á Norðurlandi, en Þórlaug hefur gert barnaverndaryfirvöldum á Húsavík viðvart vegna málsins.

Þórlaug segir í viðtali við Akureyri Vikublað að hún hafi ekki kært drengina, sem eru þó rafrænir "góðkunningjar lögreglunnar" eins og hún orðar það, heldur hafi hún tilkynnt málið til barnaverndaryfirvalda. Sömu piltar eiga að hafa orðið til þess að Facebook-aðgangi Hildar Lilliendahl hefur verið lokað reglulega síðustu mánuði.

Málið komst í fjölmiðla eftir að piltarnir breyttu mynd af Þórlaugu með þeim hætti að hún virtist vera með áverka á andliti. Myndina birtu þeir á fyrrnefndri síðu. Á myndinni stóð svo stórum stöfum "Konur eru eins og gras, það þarf að slá þær reglulega."

Málið vakti athygli út fyrir landsteinana en Þórlaug er búsett í Danmörku þar sem hún stundar nám. Meðal annars baðst talsmaður Facebook á Norðurlöndum afsökunar á því að myndin var ekki fjarlægð þegar eftir því var leitað. Þá hefur þýska blaðið Der Spigel fjallað um baráttu femínistanna við Facebook.