„Þetta er auðvitað alveg geðveikt“

„Þetta er auðvitað alveg geðveikt," segir Grímur Atlason, framkvæmdastjóri tónlistarhátíðarinnar Iceland Airwaves. Fyrr í dag var tilkynnt að þýska tölvupoppsveitin Kraftwerk mun stíga á stokk á hátíðinni, sunnudaginn 3. nóvember.

„Við sem komum að hátíðinni fögnum því að þetta sé yfir höfuð hægt og það er auðvitað stórkostlegt að listamenn eins og Kraftwerk séu reiðubúnir að koma hingað til lands."

Kraftwerk hefur fengið mikið lof fyrir tónleika sína á síðustu mánuðum. Sveitin — sem ávallt hefur boðið upp á athyglisverða tónleika — hefur innleitt nýstárlega þrívíddartækni í gjörning sinn. Tónleikagestir fá sérstök þrívíddar-gleraugu til að fylgjast með tónleikunum.

„Það verður ekkert slegið af, við munum fá þessa tveggja tíma sýningu í heild sinni á Airwaves," segir Grímur. „Þetta er heilmikið batterý en alveg ótrúlega flott."

Sveitin tekur sín bestu og vinsælustu lög á tónleikunum. Ekki verður upplýst um tónleikastaðinn að svo stöddu.

„Við getum ekki gert þetta í Laugardalshöllinni," segir Grímur. „En við verðum með stóran stað, okkar stærsta tónleikastað á Iceland Airwaves. Við munum upplýsa um þetta von bráðar."