Vantrauststillagan felld

Vantrausttillaga Þórs Saari á ríkisstjórnina hefur verið felld á Alþingi Íslendinga. 32 greiddu atkvæði gegn tillögunni en 29 greiddu atkvæði með henni. Einn þingmaður greiddi ekki atkvæði og annar var fjarverandi.

Umræða um atkvæðagreiðsluna hefur staðið yfir frá því klukkan hálfellefu í morgun. Gríðarlegur hiti var í þingmönnum á meðan umræðan fór fram.

Þingmenn Hreyfingarinnar, Sjálfstæðisflokksins og Framsóknarflokksins studdu tillöguna ásamt Lilju Mósesdóttur, þingmanni utan flokka. Jón Bjarnason, þingmaður utan flokka, sat hjá og Atli Gíslason, sem einnig er utan flokka, var fjarverandi.

Þingmenn Bjartrar framtíðar, þeir Guðmundur Steingrímsson og Róbert Marshall, greiddu atkvæði gegn vantrauststillögunni og vörðu ríkisstjórnina þannig falli.