Taskovic áfram hjá Víkingum

Knattspyrnudeild Víkings hefur komist að samkomulagi við Igor Taskovic um að hann leiki með Víkingi næsta sumar. Þetta kemur fram á stuðningsmannasíðunni Víkingur.net.

Igor kom til Víkings fyrir síðasta tímabil og í sumar spilaði hann 25 leiki fyrir félagið og skoraði 6 mörk í deild og bikarkeppni. Hann var á lokahófi knattspyrnudeildar valinn leikmaður ársins af stuðningsmönnum.

Igor leikur oftast á miðjunni en getur einnig leikið sem miðvörður. Þessi 31 árs gamli leikmaður hefur áður leikið í Sviss, Serbíu, Makedóníu, Búlgaríu og Svartfjallalandi á ferlinum.