„Sýnist stjórnin ekki hafa trú á fjárlagafrumvarpi sínu“

Árni Páll Árnason, formaður Samfylkingarinnar, segir ummæli forsætisráðherra um fjárlagafrumvarpið verða sífellt óskiljanlegri.

Árni Páll vísar til ummæla Sigmundar Davíðs á fundi kjördæmisráðs Framsóknarflokksins í NA kjördæmi sem Vikudagur fjallar um og ummæla í Vikulokum í gær á Rás eitt.

Þar segir Sigmundur Davíð meðal annars að Alþingi þurfi að skoða forgangsröðunina í frumvarpinu og gæti ákveðið að setja meira fjármagn í heilbrigðisþjónustuna en það sem lagt er til.

Árni Páll undrar sig á því hversu fljótt forsætisráðherra gefst upp á að tala fyrir fjárlagafrumvarpinu.

„Hann segir að nú muni þingið endurskoða forgangsröðunina. Maður gerir ráð fyrir að forgangsröðun meirihluta birtist í frumvarpinu og hann sé þá nú að boða að stjórnarandstaðan forgangsraði. Venjan er sú að stjórnin leggi fram fjárlagafrumvarp sem hún trúir á en mér sýnist að þessi stjórn hafi það ekki," segir Árni Páll í samtali við Vísi.

Á facebook-síðu sinni segir Árni Páll stjórnarandstöðuna vera alveg til í að ákveða forgangsröðun í fjárlagafrumvarpinu en bætir við: „en [við] veltum þá fyrir okkur hvort meirihlutinn sé þá tilbúinn til að afla tekna frá vinum sínum, t.d. með hækkun veiðigjalds? Og ef svo er, til hvers er þá ríkisstjórnin?“