Laddi gengur til liðs við Spaugstofuna

Spéfuglarnir í Spaugstofunni birtast á skjánum á ný á laugardagskvöldið með fullt af nýju og skemmtilegu efni í farteskinu, enda af nógu að taka.

„Við reynum alltaf að breyta eitthvað til á hverju hausti og finna nýja fleti til að gera grín að samfélaginu. Sumarið sem aldrei kom verður í hávegum haft í fyrsta þættinum og skyggnst inn í sumarþingið en ég segi ekki meira,“ sagði Örn Árnason þegar við slógum á þráðinn til hans.

Spaugstofumenn hafa fengið nýjan meðlim í hópinn.

„Við höfum fengið Ladda til að vera með okkur í fyrstu fimm þáttunum en hann er náttúrulega alveg frábær hæfileikamaður. Með nýrri ríkisstjórn eru mörg ný andlit og þess vegna ágætt fyrir okkur gömlu hundana að fá einn hund í viðbót í liðið,“ segir Örn og segir að áhorfendur verði ekki sviknir því undirbúningur hafi verið á fullu og mikið um að vera.

„Við verðum beittir og stingum á skemmtilegum kýlum. Fólk fær að sjá hina hlið samfélagsspegilsins,“ segir Örn enn fremur en þess má geta að þetta er 29. árið sem Spaugstofan grínar.

„Á næsta ári verður þrítugasta árið og ætli við segjum þetta ekki gott þá. Þrjátíu er falleg tala og við getum farið að horfa í aðrar áttir án þess að ég vilji hljóma eins og Besti flokkurinn sem svíkur öll loforð.“