Björn Hlynur silkimjúkur og einlægur

Leikarinn Björn Hlynur Haraldsson stelur senunni í nýrri þáttaröð Ástríðar. Þar leikur hann yfirvegað og ákveðið kvennagull sem fangar hjörtu kvenna á og við skjáinn.

„Boðorð Leibba er: Allt sem þér viljið að aðrir gjöri yður, það skuluð þér og þeim gjöra. Leifur er „no bullshit“-gæi og stundum kannski aðeins of mikið, eins og fram mun koma í þáttunum,“ segir Björn Hlynur Haraldsson um persónu Leifs lögfræðings sem hann ljáir líf og limi í nýrri þáttaröð Ástríðar.

Björn Hlynur segir þá Leif eiga fátt sameiginlegt. „Við erum svipaðir í útliti þótt ég sé ekki jafn síðhærður og Leifur. Hann er sérstök blanda af gallhörðum lögfræðingi og silkimjúkum, einlægum pilti úr Smáíbúðahverfinu.“

Er Leifur þá öfundsverður?

„Nei, ég get ekki sagt það. Ég öfunda engan mann. Öfund er af hinu illa. Ég bið alla sem þjást af því að vinsamlegast hætta því.“

Björn Hlynur hafði ekki séð alla fyrri þætti Ástríðar þegar hann ákvað að vera með.

„En ég vissi út á hvað þættirnir gengu og vildi fá að vera með. Mig langaði að taka þátt í verkefni með Silju Hauksdóttur sem er sniðug stelpa og góður leikstjóri. Svo hafði ég lúmskan grun um að þetta gæti orðið gaman því skemmtilegt fólk tengdist fyrri þáttaröðinni, eins og lærimeistari minn Kjartan Guðjónsson.“

Að sögn Björns Hlyns kemur Leifur inn í þættina sem mótherji Ástríðar í máli sem þau hafa karpað um í fjölmiðlum. Síðan tengist þau böndum sem best sé að halda sér saman um nú.

„Mér fannst á allan hátt skemmtilegt að taka þátt í Ástríði. Ég lagði sjálfan mig til í hlutverk Leifs; það er það eina sem ég get gefið. Svo bæti ég við ímynduðum hugmyndum mínum, leikstjórans og höfunda um einstaklinginn. Mér finnst mikilvægt að uppskáldaðar persónur séu tvíhliða og að eitthvað komi á óvart í fari þeirra. Þannig eru allar manneskjur. Við sýnum eina hlið en felum aðra og það er hliðin sem áhorfendur verða að fá að sjá. Mitt starf er því að sjá til þess að persónan sé ekki einhliða,“ útskýrir Björn Hlynur.

Hann segir Ástríði mikilvægan minnisvarða um samtímann.

„Þættirnir fjalla um íslenskan hvunndagsveruleika sem fyrir minn smekk mætti gera hærra undir höfði í leiknu efni. Það vilja áhorfendur sjá og því eigum við að sinna. Flestir höfundar sem skipt hafa máli í gegnum aldirnar hafa skrifað um sitt nánasta umhverfi, samfélag sem þeir bjuggu í og þekktu. Því mættu höfundar í ríkari mæli draga upp spegilmynd af samfélaginu.“

Björn Hlynur vinnur nú að sjónvarpsþáttunum Hrauninu sem eru framhald af Hamrinum. Hann leikur líka í þáttunum The Borgias, sem teknir voru í Búdapest, kvikmynd eftir mexíkóska leikstjórann Roberto Schneider, þar sem hann leikur á móti vini sínum Gael Garcia Bernal, og spennutryllinum Grafir og bein.

„Aðalverkefnið er þó fjármögnun á minni fyrstu mynd sem leikstjóri og handritshöfundur, og er byggð á leikriti mínu Dubbeldusch. Við eiginkonan vinnum nú að heimildarþáttaröðinni Reimleikar í Reykjavík og ég er með tvö leikrit í smíðum. Þá er ég orðaður við erlent hlutverk sem ég get ekki upplýst um að sinni.“