Dularfullt bréf lofar veglegum peningaverðlaunum

Framleiðslufyrirtækið Sagafilm sendir frá sér dularfullt bréf þar sem auglýst er eftir fólki í nýjan spurningaþátt. “Láttu slag standa og þú gætir gengið í burtu með fulla vasa fjár,” segir meðal annars í bréfinu.

Í bréfinu stendur enn fremur að það eina sem þátttakendur þurfi að gera sé að svara átta spurningum til að vinna sér inn vegleg verðlaun.

“Við leitum að pörum af öllu tagi; vinnufélögum, bestu vinum, feðgum, mæðgum, systkinum, frændum, frænkum og í raun öllum tvímenningum sem þekkjast vel og hafa löngun, getu og vilja til að svara almennum spurningum um allt milli himins og jarðar í sjónvarpssal,” stendur í bréfinu. Lilja Katrín Gunnarsdóttir, kynningarstjóri Sagafilm, er dularfull þegar hún er spurð út í bréfið.

“Ég get lítið sagt um þáttinn nema að hann einkennist af gríðarlegri spennu og eru spurningarnar allar almenns eðlis. Keppendur þurfa því ekki að vera sérfræðingar en það skemmir ekki ef þeir vita lítið um margt,” segir Lilja. En af hverju þurfa keppendur að þekkjast vel?

“Keppendur þurfa að treysta á hvorn annan og geta unnið vel saman. Því er mjög mikilvægt að pörin þekkist vel.”

Skráningu í þáttinn lýkur á miðnætti föstudaginn 27. september en umsóknir er hægt að senda á thatttakendur@sagafilm.is.

Facebook-síða Sagafilm