Putin ætlar að heimsækja Ísland

Ólafur Ragnar Grímsson, forseti Íslands, fundaði með Vladimir Putin forseta Rússlands í Salekhard í Rússlandi í dag. Á fundinum kom fram ríkur áhugi hjá Putin á að efla samvinnu á Norðurslóðum, auka viðskipti og heimsækja Ísland á næsta ári. Þetta kemur fram í fréttatilkynningu frá forsetaembættinu.

Í ræðu Putins komu fram eindregnar áherslur á nauðsyn umhverfisverndar á Norðurslóðum og voru þau viðhorf ítrekuð á fundi forsetanna. Jafnframt ræddu þeir um hina nýju stöðu sem skapast hefði vegna vaxandi áhuga forysturíkja í Asíu og Evrópu á málefnum Norðurslóða. Forseti Rússlands lýsti ítarlega viðhorfum og undirbúningi Rússa vegna þeirra nýju siglingaleiða sem væru að opnast vegna bráðnunar hafíss, jafnvel í 3-4 mánuði á ári hverju.

Á fundinum var einnig fjallað um aukin viðskipti milli Íslands og Rússlands, þátttöku íslenskra fyrirtækja og sérfræðinga í hitaveituframkvæmdum og nýtingu jarðhita í Rússlandi sem og fjölgun ferðamanna, m.a. í kjölfar áætlunarflugs Icelandair til Pétursborgar.

Þá fagnaði forseti Rússlands sérstaklega opnun Kjarvalssýningar í Pétursborg og öðrum menningaratburðum í tilefni af 70 ára afmæli stjórnmálasambands landanna.