Raddir fortíðar lifnuðu við á menningarnótt

Meðfylgjandi myndir voru teknar í Þjóðminjasafni Íslands á menningarnótt þegar Heiðdís Einarsdóttir meistaranemi í Hagnýtri menningarmiðlun við Háskóla Íslands var með viðburð sem hún nefndi Raddirfortíðar. 

Viðburðurinn er hluti af lokaverkefni Heiðdísar en verkefnið byggir á grunnsýningu Þjóðminjasafns Íslands og var viðburðurinn leiðsögn um grunnsýninguna Þjóð verður til með leikrænu ívafi þar sem valdir hlutar sögunnar og sýningarinnar voru teknir út og þeim veitt athygli.

„Hugmyndin var að beina sjónum að þáttum sem eru minna áberandi í sögunni og grunnsýningu safnsins," segir Heiðdís spurð um verkefnið.

„Gestir Þjóðminjasafnsins fengu að fræðast frá fyrstu hendi hvernig Auður Djúpúðga þurfti að marka sér land á annan hátt en aðrir landnámsmenn. Víkingafjölskylda sást á vappi og ung víkingamóðir sagði frá útburði barna. Munkar birtust og kyrjuðu munkasöng en sönghópinn Mr. Norrington tók að sér hlutverk miðaldamunka. Galdrakonu einni var ljáð rödd í sýningunni og fræddi hún gesti um hvernig tilberi er búinn til. Og í stað Jón Sigurðssonar fékk eiginkona hans, Ingibjörg Einarsdóttir að njóta sín með eigin frásögn," segir Heiðdís.

Verkefnið var unnið í fullri samvinnu við Þjóðminjasafn Íslands og fékk Heiðdís með góðum vilja að nota safnið sem leiksvið fyrir viðburðinn.

Með aðstoð vina og vandamanna, sem tóku að sér ýmiskonar hlutverk, heppnaðist sýningin mjög vel. Var viðburðurinn fluttur tvisvar sinnum og var vel sóttur í bæði skiptin.

Tuttugu manns tóku þátt í viðburðinum þar af ellefu börn og unglingar á aldrinum 4 – 16 ára sem stóðu sig með mikilli prýði að sögn Heiðdísar.

Flestir leikaranna þurftu að skipa um búninga á meðan sýningu stóð þar sem þeir áttu hlutverk á báðum hæðum grunnsýningarinnar.

Sýningin var mikil umfangs þar sem tímabilið frá landnámi og til loka 20. aldar var til umfjöllunar á einungis 35 mínútum.

Heiðdís fékk engan annan en Kristján Þ. Jónsson fyrrum skipherra Landhelgisgæslunnar til að vera fulltrúi Þorskastríðsins.

Smelltu á efstu myndina í frétt til að skoða albúmið í heild sinni.