Tveggja ára stelpa læknaðist af HIV

Tveggja ára gömul stelpa frá Mississippi er læknuð af HIV. Hún er fyrsta barnið í heiminum sem læknast af sjúkdómnum. Sérfræðingar telja að ástæðan fyrir því að hægt var að lækna hana sé sú að tekist hafi að grípa snemma inn í sjúkdómsferlið.

Lyfjagjöf hófst þegar stúlkan var einungis 30 klukkustunda gömul og fékk hún þá andretróveirulyf, (e. antiretroviral drugs) sem notuð eru í meðferð við sýkingu af völdum HIV-veirunnar.

Niðurstöður úr meðferð barnsins voru kynntar á ráðstefnu um ónæmisfræði í dag, en fjallað er um málið í New York Times.

Barnið fæddist með HIV-veiruna en móðirin hafði greinst með veiruna skömmu fyrir fæðingu þess og smitaðist barnið í móðurkviði.

Hér má lesa meira um málið.