Bindur vonir við ósátta stjórnarliða

„Það er svo sem lítið við þessu að segja. Það er meirihlutinn á þingi sem ákveður að beita valdi sínu eftir því sem honum hentar."

Þetta segir Þór Saari, þingmaður Hreyfingarinnar, í samtali við Fréttablaðið en hann er ósáttur við ákvörðun, Ástu Ragnheiðar Jóhannesdóttur, forseta Alþingis, um að taka vantrauststillögu hans ekki á dagskrá fyrr en á mánudaginn. Hann segist þó ekki bjartsýnn á að tillagan verði samþykkt, en vonar að ósáttir stjórnarliðar mæti ekki í atkvæðagreiðsluna.

Í tilkynningu segir Ásta Ragnheiður að eftir samtal við forystumenn flokka hafi verið ljóst að ekki væri vilji til að veita afbrigði til þess að taka tillöguna í gær.

Hún sagði meginsjónarmið sitt að tryggja að allir þingmenn geti gert ráðstafanir til að vera við atkvæðagreiðsluna. Með þessu ættu allir að geta verið viðstaddir atkvæðagreiðsluna „þannig að vilji þingsins geti þá komið skýrt fram".

Þór segist aðspurður telja nokkrar líkur á því að tillagan verði samþykkt, „en ég þori ekki að leyfa mér að vera mjög bjartsýnn."

Þór segir mikla óánægju innan stjórnarflokkana með framgöngu formanna stjórnarflokkanna, þeirra Katrínar Jakobsdóttur og Árna Páls Árnasonar, í stjórnarskrármálinu og segist aðspurður vona að fólk úr þeim hópi sniðgangi atkvæðagreiðsluna.