Bakraddir Bjarkar í stjörnufansi í L.A.

„Við hittum fullt af stjörnum í partíi eftir tónleika okkar og Bjarkar hér í Hollywood,“ segir Elín Edda Sigurðardóttir, kórstúlka úr Graduale Nobili, en kórinn er á tónleikaferðalagi með Björk í Bandaríkjunum.

Á laugardagskvöldið fóru fram tónleikar Bjarkar í Hollywood en þangað mættu meðal annars stórstjörnurnar Robert Pattinson, Katy Perry, Tommy Lee Jones og hin sænska Robyn. Eftir tónleikana var öllum boðið í eftirpartí.

„Ég spjallaði aðeins við Pattinson og hann sagðist vera ótrúlega hrifinn af Björk. Svo talaði ég við Robyn sem var mjög skemmtileg. Hún virkar mjög jarðbundin.“

Elín Edda segir að ágengir ljósmyndarar hafi verið úti um allt fyrir utan partíið. „Þegar Katy Perry var að fara hélt ég að það væri einhver sýning í gangi fyrir utan, einhvers konar ljósashow. Þegar ég leit út sá ég bara að þetta var heill her af papparössum.“

Kórinn hefur verið í Hollywood í tæpar tvær vikur en heldur til Nashville í dag. Á mánudag var hópnum boðið í sundlaugarpartí heim til leikarans Dannys DeVito í Beverly Hills-hverfinu.

„Synir mannsins sem framleiddi Avatar-myndina eru miklir aðdáendur Bjarkar en þeir eru vinir Dannys DeVito. Þeir buðu okkur í sundlaugarpartí. Húsin þarna í Beverly Hills eru alveg fáránleg.“

Kórinn hefur verið á ferðalagi með Björk um langt skeið eða alveg frá því að Biophilia-plata Bjarkar kom út árið 2011.

„Við fórum fyrst með Björk til Manchester fyrir um tveimur árum. Þegar við förum í tónleikaferðalag erum við ýmist á sama stað í nokkrar vikur, eða eins og síðasta sumar, þegar við flökkuðum á milli tónlistarhátíða í tónleikarútu.“

Kórstúlkurnar smelltu myndum af sér með Robert Pattinson á laugardagskvöldið og birtu á Instagram. Slúðurmiðlarnir ytra voru ekki lengi að taka við sér og birtust myndirnar á vefmiðlunum Hollywoodlife.com strax degi síðar.

Pattinson er einn eftirsóttasti piparsveinninn í Hollywood en hann er nýhættur með leikkonunni Kristen Stewart.