Tæknilegt gjaldþrot Landspítalans kostaði þrjá milljarða

Ríkið er enn að takast á við tæknilegt gjaldþrot Landspítalans en enn þá á eftir að greiða þrjá milljarða króna sem stóðu út af í rekstri Landspítalans árið 2008.

Þetta kemur fram í samtali við Björn Val Gíslason, þingmann Vg og formann fjárlagaráðs.

„Þegar þessar aðstæður komu upp spurðum við okkur hvern fjandann við ættum að gera, ekki gátum við látið spítalann fara í þrot, og ekki stóð hann undir þessum glórulausa halla sem var afleiðing einkavæðingaráforma fyrri ríkisstjórna. Við tóku því þessa þrjá milljarða sem stóðu út af og ýttum þeim einfaldlega til hliðar," segir Björn Valur þegar hann rifjar upp þá erfiðu stöðu sem blasti við Landspítalanum skömmu eftir hrun.

Hulda Gunnlaugsdóttir, fyrrverandi forstjóri Landspítalans, sagði í viðtali við norska blaðið Aftenposten í dag að spítalinn hefði farið í tæknilegt þrot þegar hún stjórnaði honum. Björn Zoëga, núverandi forstjóri Landspítalans, staðfesti þetta í samtali við Vísi fyrr í dag og sagði það með samhentu átaki hafi verið ákveðið að vinda ofan af þessari erfiðu stöðu.

Aðspurður hvernig þessi 3 milljarða króna skuld verði leyst svarar Björn Valur að það sé aðeins tvennt í stöðunni, auka framlög til spítalans eða afskrifa skuldina. Skuldin hefur þó verið greidd að sögn Björns, birgjar og aðrir sem spítalinn skuldaði hafa þegar fengið borgað.

„Þessir þrír milljarðar eru því enn í geymslu og við erum enn að takast á við það hvað skal gera," segir Björn Valur en líklega mun þessi eftirávandi Landspítalans velta yfir á næsta kjörtímabil.