Björn Zoëga vissi af alvarlegu ástandi Landspítalans

„Ég vissi þetta alveg," segir Björn Zoëga, forstjóri Landspítalans, spurður út í viðtal við Huldu Gunnlaugsdóttur, fyrrverandi forstjóra spítalans, í norska dagblaðinu Aftenposten en þar sagði hún að staðan í hruninu hafi verið orðin svo grafalvarleg að spítalinn hafi ekki átt fyrir launum né lyfjum.

Björn leysti Huldu af sem forstjóri í hruninu og segir að honum hafi verið fullkunnugt um ástandið. Hann segir að staðreyndin hafi einfaldlega verið sú að það var ekki til króna í ríkiskassanum, „og spítalinn skuldaði birgjum og fleirum út um allan bæ," bætir hann við.

Spurður hvernig það hafi tekist að fyrirbyggja að ekki hafi farið verr svarar Björn því að fjölmargir hafi komið að málinu, meðal annars ráðherrar fjármála og heilbrigðis sem fóru í það að tryggja innkaup á lyfjum og að laun yrðu greidd út áfram.

„Það voru margir sem komu að þessu, en það tók tíma af vinda ofan af þessu endanlega," segir Björn um vandann sem spítalinn glímdi við. Spurður hvort þetta hafi endurtekið sig eftir hrun, það er að segja þessi alvarlega staða, svarar Björn: „Eftir þetta lagði ég ofuráherslu á að við yrðum að standast fjárlögin svo við myndum ekki lenda í þessu aftur. Það höfum við gert síðustu ár."

Björn segir þetta vissulega fjarlæga hugmynd og ríma illa við þá hugmynd sem almenningur hefur varðandi stöðugleika heilbrigðiskerfisins, „auðvitað er það svo, en þetta voru bara þannig tímar. Og svona var þetta líklega víðar," útskýrir Björn.

Spurður hvort spítalinn sé enn að glíma við afleiðingar þessarar alvarlegu stöðu sem blasti við spítalanum veturinn 2008 segir Björn að spítalinn sé auðvitað enn að glíma við hrunið. „Það er búið að skera niður um 22 prósent hjá okkur síðan hrunið varð."