Garðsmennirnir kláruðu leikinn

Magnús Þórir Matthíasson var búinn að vera inn á í aðeins tvær mínútur þegar hann lagði upp jöfnunarmark Keflavíkur gegn Víkingi Ólafsvík í leik liðanna í fyrrakvöld. Markið breytti leiknum og Keflavík vann að lokum 3-1 sigur, þar sem Magnús sjálfur skoraði þriðja mark sinna manna.

Magnús fær því nafnbótina leikmaður umferðarinnar að þessu sinni hjá Fréttablaðinu en hann sneri aftur til liðsins stuttu fyrir tímabilið eftir að hafa verið hjá Fylki í eitt ár.

„Ég er ekkert ósáttur við að vera á bekknum, þó svo að maður vilji alltaf byrja. En það er stutt síðan ég kom og ég er enn að vinna mér sæti í liðinu,“ sagði Magnús Þórir við Fréttablaðið í gær.

Bæði lið voru stigalaus fyrir leikinn í Ólafsvík og leikurinn því mikilvægur. „Það var mjög gott að fá fyrstu stigin og svolítill léttir líka. Þó svo að þetta hafi verið bara þriðja umferð má segja að þetta hafi verið sex stiga leikur.“

Jóhann Birnir Guðmundsson skoraði tvö mörk Keflavíkur og Magnús eitt. Þeir eiga það sameiginlegt að koma úr Garði. „Við grínuðumst með það eftir leik að Garður hafi bjargað Keflavík í þetta skiptið,“ segir hann í léttum dúr.

Keflavík mætir næst Fylki á þriðjudagskvöld og Magnús Þórir vonast til að fá tækifærið í byrjunarliðinu gegn sínu gamla félagi. Hann fór frá Fylki í vetur með heldur skömmum fyrirvara.

„Ási [Ásmundur Arnarsson, þjálfari Fylkis] er toppmaður en það voru svo sem engir neistar á milli okkar. Ég var ekki framarlega í goggunarröðuni hjá honum og því var alveg eins gott að ljúka þessu. Ég ákvað því að fylgja innri tilfinningu enda óþarfi að eyða heilu sumri í að vera ósáttur í einhverju liði. Það er einu tímabili of mikið.“

Hann segist hlakka til að mæta sínum gömlu liðsfélögum úr Árbænum. „Það gefur alltaf smá auka kraft að spila gegn sínu gamla liði en annars lít ég ekki öðruvísi á hann. Ég vil bara standa mig eins vel og ég get, eins og í öllum leikjum.“

Lið 3. umferðarinnar:

Markvörður:

Róbert Örn Óskarsson, FH

Varnarmenn:

Magnús Már Lúðvíksson, Val

Sam Tillen, FH

Brynjar Gauti Guðjónsson, ÍBV

Miðvallarleikmenn:

Rúnar Már Sigurjónsson, Val

Gunnar Þorsteinsson, ÍBV

Hólmbert Aron Friðjónsson, Fram

Magnús Þórir Matthíasson, Keflavík

Sóknarmenn:

Gary Martin, KR

Elfar Árni Aðalsteinsson, Breiðabliki

Veigar Páll Gunnarsson, Stjörnunni