Ætla mér að skora tíu mörk

Árni verður 19 ára gamall á morgun en hann stundar nám við Menntaskólann í Kópavogi samhliða því að spila fótbolta með Blikum. Hann er því á fullu í prófum þessa dagana og ganga þau ágætlega að hans sögn.

Prófin voru svo sannarlega ekki að trufla hann í leiknum gegn Þór þar sem hann lék á als oddi.

„Þetta var frábær byrjun hjá okkur og mér. Þetta var nákvæmlega það sem bæði ég og liðið ætluðum okkur,“ segir Árni og bætir við að frábær spilamennska Blikaliðsins hafi ekki komið honum á óvart.

„Maður tekur út það sem maður hefur lagt inn og við höfum lagt mikið inn. Allir þrír framherjarnir skoruðu og liðið spilaði vel. Þetta gat því vart verið betra.“

Árni segist ekki geta lofað því að hann muni skora tvö mörk í hverjum leik en hann stefnir á að skora talsvert fleiri mörk í sumar.

„Ég setti mér það markmið fyrir mót að skora í það minnsta tíu mörk. Ef það gengur upp í sumar verð ég að setjast niður og setja mér ný markmið. Markmiðið hjá mér fyrir sumarið var að byrja alla leiki, vera lykilmaður í liðinu og skora tíu mörk,“ segir Árni en eftir því er tekið hvað hann hefur tekið miklum framförum milli ára.

„Ég tók til í hausnum á sjálfum mér. Breytti mataræðinu og styrkti mig. Það er klárlega að hjálpa mér núna því ég er sterkari og fljótari en ég var. Það er ekkert mál því þetta er það skemmtilegasta sem ég geri og ég vil ná árangri. Ég æfi skynsamlega og eftir markmiðum í dag.“

Félagarnir ráða hvernig fagnað er

Árni lék ekki bara vel heldur fagnaði hann líka skemmtilega, í stíl við Emile Heskey, fyrrverandi landsliðsmann Englands, sem varð frægur fyrir það á sínum tíma.

„Ég er með menn í þessum málum. Það eru félagar mínir sem ráða því hvernig ég fagna. Þeir komu þessa hugmynd og ég hugsaði bara af hverju ekki þegar ég skoraði. Þetta var skemmtilegt,“ sagði strákurinn og hló dátt en hann á klárlega eftir að láta mikið að sér kveða á vellinum í sumar.