Ungt fólk drekkur eins og foreldrarnir

Niðurstöður nýrrar, norskrar rannsóknar sýna að ungt fullorðið fólk hefur sömu drykkjuvenjur og foreldrarnir. Drekki foreldrarnir sig oft fulla gerir unga fólkið það einnig. Drekki foreldrarnir oft en lítið í hvert sinn erfa börnin einnig þetta drykkjumynstur, að því er segir í frétt á vef Aftenposten um rannsóknina.

Þar segir að fylgst hafi verið með rúmlega 2.500 ungmennum frá því að þau voru 15 ára þar til þau voru 28 ára.

Haft er eftir Willy Pedersen, prófessor við Instistutt for sosiologi og samfunnsgeografi við Óslóarháskóla, að margt ungt fólk neyti mikils áfengis um ákveðið skeið. Sláandi við niðurstöður rannsóknarinnar sé hins vegar hversu langvarandi áhrifin séu af drykkjumynstri foreldranna.

Samhengið milli drykkjumynsturs foreldranna og unga fólksins reyndist sterkara til langs tíma litið, heldur en áhrif frá vinum og menningu að öðru leyti. Þess er jafnframt getið að erfðir skipti máli.

„Erfðir eru stærsti staki áhættuþátturinn þegar um áfengissýki er að ræða en að sjálfsögðu hefur umhverfið einnig áhrif. Unglingi sem elst upp hjá foreldrum sínum finnst ekki óeðlilegt að vera fullur um helgar ef mamma og pabbi eru það. En ef sami unglingur væri alinn upp á heimili þar sem drykkjumynstrið væri öðruvísi þá gæti hann fyrr litið á eigin drykkju sem vandamál,“ segir Valgerður Rúnarsdóttir, læknir á Sjúkrahúsinu Vogi.

Drykkjumynstur alkóhólista breytist oft með tímanum, að því er Valgerður greinir frá. „Það getur breyst frá helgardrykkju yfir í að einstaklingarnir fara að drekka alla daga eða öll kvöld. Það rennur aldrei af þeim en þeir eru samt ekki fullir. Það er hins vegar ekki vandamál ef menn drekka eitt glas með steik öðru hverju.“

Haft er eftir Pedersen á fréttavef Aftenposten að foreldrar þurfi að hafa í huga að börnin geti tekið upp drykkjumynstur þeirra. Það sé að vísu ekki vinsælt að lýsa slíku yfir þar sem foreldrarnir hafi sjálfir svo mikla ánægju af áfenginu.