Farðar á daginn og kennir á kvöldin

„Ég held utan um kennsluna, kennsluefnið og námsskrána og svo ætla ég að sjálfsögðu að kenna líka,“ segir Steinunn Þórðardóttir, förðunarfræðingur. Hún hefur nú tekið við stöðu skólastjóra förðunardeildar Elite Fashion Academy.

Í skólanum er hægt að sækja námskeið í förðun og ljósmyndun auk námskeiða fyrir stílista og fyrirsæta. Námskeiðunum er svo öllum tvinnað saman svo að nemendur fái að kynnast því hvernig sé að vinna innan tískugeirans.

“Við vorum líka að taka inn vörur frá merkinu Make Up Forever þannig að nemendur læra strax að farða með frábærum vörum ætluðum fagmönnum.”

Steinunn er einn virtasti förðunarfræðingur landsins og hefur starfað sem slíkur frá árinu 2004. Hún lýsir starfinu sem bölvuðu harki en tekur fram að það sé einnig stórkostlega skemmtilegt.

„Ég hef verið mjög heppin með verkefni fram að þessu. Ég byrjaði sjálf í tískuförðun fyrir prentauglýsingar, færði mig svo yfir í sjónvarpsauglýsingar og þaðan í kvikmyndir. Svartur á leik var mín fyrsta kvikmynd og nú er ég að vinna við sjöttu myndina mína,“ segir Steinunn, en hún var meðal annars tilnefnd til Eddu verðlaunanna fyrir förðun fyrir kvikmyndina Svartur á leik.

Steinunn hyggst sinna starfi förðunarfræðings áfram samhliða því að stýra Elite Fashion Academy. „Ég tel mikilvægt að fólk fái kennara sem hafi nóg að gera og hafi ekki staðnað í starfi. Ég held því áfram að vinna sem sminka á daginn og verð skólastjóri á kvöldin,“ segir hún og bætir hlæjandi við: „Svo kenni ég jóga þess á milli, svo ég fái smá jarðtenginu.“

Námið hefst á mánudag og enn eru örfá pláss laus. Hægt er að skrá sig á heimasíðu skólans.