Örn Árnason er algjör tertukall

Einhver þekktasti sprengjumaður um áramót er Örn Árnason leikari og skemmtikraftur. Hann var með sérstakt fyrirtæki, við annan mann, bomba.is, og flutti inn sitt eigið sprengjudót en það fór í þrot. Var það vegna óheppni í innkaupum, í hitteðfyrra þurfti bomba að innkalla stórar tertur sem reyndust gallaðar.

Af þessu hlaust verulegt tjón, þeir bombumenn, Örn og Arnar Barðdal, sátu uppi með talsvert af tertum sem þeir höfðu greitt fyrir og þurfti bomba að gera hlé á starfsemi. Þeir vildu vera ábyrgir flugeldasalar, vera alveg öruggir um að engin slys yrðu og tóku tjónið á sig.

DV greindi frá því að lýstar kröfur í þrotabúið hafi numið rúmlega 6,7 milljónum króna. En, skiptum er lokið og þeir stefna ótrauðir að því að koma aftur tvíefldir um næstu áramót. „Eigum við ekki að segja það? En, þetta verður reyndar að koma í ljós. Þetta hefur hækkað um 35 prósent á undanförnum árum, púðrið og innflutningur þannig að þetta þarf að skoðast.“

Engin bomba.is um þessi áramótin og því ekki úr vegi að spyrja hvar Örn Árnason ætli að kaupa sína flugelda? „Ég kaupi ekki flugelda. Ég er ekki prikakall. Ég er tertukall. Ég á eitthvað frá því í fyrra. Nokkrar kökur og ætla að nýta mér það. Og er góður. Smádótið tilheyrir mér ekki. Ég hef alltaf verið frekar settlegur í þessu.“

Settlegur? Það rímar ekki við þá ímynd sem er af Erni sem einum helsta öfgamanni í sprengingum um áramót. „Jájá, fólki finnst gaman að ýkja hlutina. En, þetta eru nú sögusagnir frekar en hitt og ég hef ekkert verið að blása á þær. Eigum við að láta góðar sögur gjalda sannleikans?“