"Alla langar að hjálpa en fólk veit kannski ekki hvernig það getur gert það"

Vinkonurnar Áslaug Þorgeirsdóttir og Rakel Rúnarsdóttir standa á bak við verkefnið Hjálp um jólin- Hafnarfjörður, sem ætlað er að aðstoða fjölskyldur sem þurfa á hjálp að halda fyrir jólahátíðina. „Þetta er oft erfiður tími fyrir fólk sem hefur lítið á milli handanna og við ákváðum að einblína á Hafnarfjörð, heimabæ okkar,“ segir Rakel.

Söfnunin fer vel af stað og hafa bæði fyrirtæki og einstaklingar stutt hana, með vörum og frjálsum framlögum. „Það hefur komið mér skemmtilega á óvart hvað allir eru tilbúnir að hjálpa og leggja sitt af mörkum,“ segir Rakel.

Þörfin er víða og má sem dæmi nefna að 700 fjölskyldur munu fá aðstoð hjá Fjölskylduhjálp Íslands fyrir þessi jól og neyðast samtökin til að hafna hjálparbeiðnum á hverjum degi.

Og eruð þið komnar með einhverjar fjölskyldur sem munu þiggja þessa hjálp?

„Já, við erum búnar að fá nokkuð margar ábendingar þannig að það verður erfitt að velja,“ segja þær.

Uppboð til styrktar söfnuninni stendur nú yfir á facebooksíðunni Hjálp um jólin. Þar er boðin upp glæsileg uglumynd frá hafnfirsku listakonunni Heiðdísi Helgadóttur og er hægt að bjóða í hana þar til á morgun.

En hvernig skyldi hugmyndin að söfnuninni hafa kviknað?

„Alla langar að hjálpa en fólk veit kannski ekki hvernig það getur gert það. Við bara hentum okkur í djúpu laugina og byrjuðum að senda tölvupósta. Þetta vatt upp á sig og varð allt í einu að stærra verkefni. Ég held það geti þetta allir,“ segir Áslaug að lokum.

Á Facebooksíðu söfnunarinnar eru nánari upplýsingar.