Verða að breyta hugsunarhætti sínum gagnvart ölvunarakstri

„Breyta þarf hugsunarhætti Íslendinga í garð ölvunaraksturs." Þetta segir maður sem ók ölvaður og olli banaslysi fyrir 15 árum. Í dag var þeirra minnst sem látist hafa í umferðarslysum.

Fjölmenni var samankomin við bráðamóttöku Landspítlanans í Fossvogi í morgun og fórnarlamba umferðarslysa minnst. Þriðja sunnudag í nóvember er efnt til hliðstæðrar athafnar víða um heim og hefur sú hefð skapast hér á landi og að heiðra þær starfstéttir sem kom að björgun og aðhlynningu þegar umferðarslys verður. 12 eru nú þegar látnir í ár í alvarlegum umferðarslysum.

Meðal þeirra sem tóku til máls var Ólafur Ingvar Guðjónsson. Hann ók ölvaður þegar hann var 17 ára gamall og olli umferðarslysi sem varð til þess að unga kona lét lífið.

„Það er rosalegt, samfélagsálitið á ölvunarakstri. Það eru menn sem fara með þetta sem gamanmál. Þeir segja: ,Djöfull var ég fullur í gær. Ég man ekki einu sinni hvernig ég komst heim en bíllinn var á sínum stað'. Menn hlægja af þessu og segja að maður sé ruglaður. Svo lendir einhver í slysi og verður einhverjum að bana. Þá standa allir og benda á þig: ,Helvítis fífl og aumingi - þú átt ekkert gott skilið'. Það verður að breyta þessum hugsunarhætti,“ segir Ólafur Ingvar.

Ellen Björnsdóttir hjúkrunarfræðingur hefur starfað sem hjúkrunarfræðingur í 30 ár. Hún segir það aldrei venjast að sjá alvarlega slasaða sjúklinga. „Í rauninni þá óskar maður engum að sjá það sem við höfum séð hérna. Þó að maður sé búin að vera hérna í 30 ár þá venst þetta aldrei. Maður er með í bakpokanum mál sem ekki er hægt að losna við þrátt fyrir að hafa leitað sér aðstoðar.“

Hanna Birna Kristjánsdóttir, innanríkisráðherra vill efla umferðaröryggi með auknu viðhaldi á vegum landsins. „Við höfum aðeins verið að slá slöku við hvað það varðar á undanförnum árum vegna kreppu. Við verðum að tryggja að umferðar- og samgöngumannvirkin okkar séu örugg og almenningur geti ekið um og farið sinnar leiðar og treyst því að hlutunum sé haldið vel við.“